सातौं विश्व शारीरिक सुगठन तथा फिजिक स्पोर्ट्स च्याम्पियनसिपअन्तर्गत शारीरिक सुगठनमा ऐतिहासिक सफलता प्राप्त गरेका रुजेश शाहीलाई बिहीबार त्रिभूवन अन्तर्राष्ट्रिय विमानस्थलमा भब्य स्वागत गरियो ।

मंसिर ८ देखि १४ गतेसम्म थाइल्यान्डको बैंककमा भएको प्रतियोगिताको पुरुष ५५ केजीमा रुजेशले रजत जित्दै नेपाली शारीरिक सुगठनको इतिहासमा अहिलेसम्मकै ठूलो उपलब्धि हात पारेका थिए । उनले प्रतिस्पर्धा गरेको तौलसमूहमा ९ राष्ट्रको सहभागिता रहेको नेपाल शारीरिक सुगठन तथा फिट्नेस संघका महासचिव दिनेश राजभण्डारीले जनाएका छन् । त्यसमा भारत पहिलो र चीन तेश्रो भएका थिए । यसअघि श्याम श्रेष्ठले भारतको बनारसमा सन् २०१० मा भएको दोश्रो संस्करणमा नेपाललाई कांस्य दिलाएका थिए ।

प्रतियोगिताको पुरुष ६५ केजीमा महेश्वर महर्जनले चौथो स्थान हासिल गरे । त्यो स्पर्धामा १३ प्रतिस्पर्धीले भाग लिएका थिए ।

रुजेशलाई विमानस्थलमा संघका पदाधिकारी, खेलाडी, प्रशिक्षक, अभिभावक, साथीभाइलगायतले बाजागाजासहित भब्य स्वागत गरेका थिए । त्यसपछि रुजेशलाई नगर परिक्रमा पनि गराइएको थियो । रुजेशसहितको नेपाली शारीरिक सुगठन टोली बिहीबार स्वदेश फर्किएको हो ।