काठमाडौं (हाम्रो खेलकुद) पूर्व ओलम्पियन तथा भारोत्तोलन खेलमा नेपाललाई सर्वाधिक पदक दिलाउन सफल स्वर्गीय सुनिल सुनिलला जोशीको स्मृतिमा सुनिललाल जोशी स्मृति ‘स्ट्रोङगेष्ट’ भारोत्तोलन च्याम्पियनसिप हुने भएको छ ।

आयोजक काठमाडौं जिल्ला भारोत्तोलन संघले बुधबार पत्रकार सम्मेलन गर्दै पहिलो संस्करणको सुनिललाल जोशी स्मृति ‘स्ट्रोङगेष्ट’ भारोत्तोलन च्याम्पियनसिप यही भाद्र २८ र २९ गते दुई दिन हुने जानकारी गराएको हो । अन्तर्राष्ट्रिय भारोत्तोलन संघ र नेपाल भारोत्तोलन संघको निर्णय अनुसार हुने च्याम्पियनसिपमा तीन विभाग र १८ जिल्लाका गरी करिव ९० खेलाडीले सहभागिता जनाउने आयोजकले जनाएको छ ।

प्रतियोगितामा कुल २७ तौल समूहमा प्रतिस्पर्धा हुनेछ । सिनियर महिलातर्फ सात विधा ४८ केजी, ५३ केजी, ५८ केजी, ६३ केजी, ६९ केजी, ७५ केजी र ७५ केजीभन्दा माथि हुनेछ । यस्तै सिनियर पुरुषतर्फ ५६ केजी, ६२ केजी, ६९ केजी, ७७ केजी, ८५ केजी, ९४ केजी, १०५ केजी र १०५ केजी गरी आठ तौल विधामा प्रतिस्पर्धा हुनेछ । जुनियर महिला र पुरुषतर्फ समान ६–६ विधामा प्रतिस्पर्धा हुनेछ ।

स्ट्रोङगेष्ट महिला र पुरुषले समान ११ हजार नगदर पुरस्कार प्राप्त गर्नेछ । यस्तै सिनियर र जुनियर दुवै तर्फको विजेतालाई पुरस्कृत गरिने आयोजकले जनाएको छ । भने सिनियर र जुनियरका पुरुष र महिलाका वेष्ट लिफ्टरलाई नगदसहित पुरस्कृत गरिने आयोजले जनाएको छ । यस्तै राष्ट्रिय कीर्तिमान बनाउन सफल हुने पुरुष र महिला खेलाडीलाई नगदसहित तथा उदयमान खेलाडी ट्रफीसहित सम्मानित हुनेछ ।