काठमाडौं (हाम्रो खेलकुद)– नवनियुक्त युवा तथा खेलकुद मन्त्री राजेन्द्रकुमार केसीले १३ औं दक्षिण एसियाली खेलकुद (साग) आयोजना ठूलो चुनौती रहेको उल्लेख गर्दै बजेटका कारण खेलकुद विकासका असर नपर्न प्रतिबद्धता जनाएका छन् । नेपालले सन् २०१९ मा साग आयोजनाको जिम्मेवारी पाएपनि भौतिक पूर्वाधार निर्माणको काम ठोस रुपमा सुरु हुन सकेको छैन ।

सातदोबाटोस्थित अन्तर्राष्ट्रिय खेलकुद परिसरमा राष्ट्रिय खेलकुद परिषद् (राखेप) ले आइतबार आफुलाई बधाइ तथा स्वागत गर्न आयोजित कार्यक्रमलाई सम्बोधन गर्दै मन्त्री केसीले २४ दिन भित्र खेलकुदमा परिवर्तनको अनुभूति गराउने उद्घोष गरे । । हिन्दी फिल्म नायकमा मुख्य मन्त्रीले २४ घन्टामा सुधारका काम गरेको प्रंसग उल्लेख गर्दै मन्त्री केसीले भने, ‘म ५ महिना, ९ महिना भन्दिन । २४ दिनमै खेलकुदमा परिवर्तनको अनुभूति गराउने गरी काम गर्नेछु ।’

मन्त्री केसीले कार्यक्रम, क्यालेन्डर र नीति÷तिथि अनुसार कार्यक्रम प्रस्तुत गरे बजेट ल्याउन आफू पहल गर्न तयार रहेको बताए । उनले लोकतन्त्रमा लोकतान्त्रिक पद्धति अनुसार खेल संघको विवाद समाधान गर्ने बताउदै दलगत स्वार्थ भन्दा माथि उठेर काम गर्ने उल्लेख गरे । उनले कसैलाई पनि विभेदको अनुभूति हुन नदिने पनि स्पष्ट पारे ।

राखेपका उपाध्यक्ष लामा टेन्डी शेर्पाले मन्त्रीको कार्यकाललाई सफल बनाउन सिंगो परिषद् एक ढिक्का भएर सहयोग गर्ने बताउदै कार्यकाल सफलताका लागि शुभकामना दिए । राखेपका सदस्य–सचिव केशवकुमार विष्टले फरक पार्टीको मन्त्री भएकै कारण खेलकुदमा विवाद आउन नदिने बताउदै सबैको पहलले मात्र खेलकुदको समस्या हल हुने बताए ।

उनले आफ्नो दुई वर्षे कार्यकालमा नेपालले अन्तर्राष्ट्रिय प्रतियोगितामा सर्वाधिक पदक जितेको, सर्वाधिक प्रतियोगिता भएको, सबै भन्दा बढी भौतिक पूर्वाधार निर्माण भएको, खेलाडीले सुविधा पाएको दाबी गर्दै त्यसको पुस्तक चाँडै सार्वजनिक गर्ने जानकारी गराए ।
राखेपका अध्यक्ष समेत रहेका मन्त्री केसीलाई सदस्य–सचिव विष्टले माया चिनो प्रदान गरे । सोही अवसरमा काठमाडौं जिल्ला खेलकुद विकास समितिका अध्यक्ष ध्रुवराज न्यौपानेले पनि मन्त्री केसीलाई मायाको चिनो प्रदान गरे ।