काठमाडौं (हाम्रो खेलकुद) – एसियाली युथ तथा जुनियर भारोत्तोलन च्याम्पियनसिपमा नेपालका कमला श्रेष्ठ र सन्जु चौधरीले नयाँ राष्ट्रिय कीर्तिमान कायम गरेका छन्। दुवै खेलाडीले स्न्याच, क्लिन एण्ड जर्क र कुल गरेर ६ राष्ट्रिय कीर्तिमान भंग गरेका हुन्।

कीर्तिमानधारी कमला श्रेष्ठ

लगनखेलस्थित आर्मी शारीरिक तथा तालिम केन्द्रमा भएको महिला ५८ केजीमुनि कमलाले स्न्याच र क्लिन एण्ड जर्कमा कुल १५२ केजी भार उठाउदै आफ्नै कीर्तिमानलाई भंग गरेकी हुन् । उनले स्न्याच, क्लिन एण्ड जर्क र कुल सबैमा नयाँ कीर्तिमान कायम गरिन्। कमलाले स्न्याचमा ६७ र क्लिन एण्ड जर्कमा ८५ केजी भार उचालेकी थिईन् । कमलाले यसअघि गत माघमा पूर्वाञ्चलमा भएको सातौ राष्ट्रिय खेलकुदमा स्न्याच र क्लिन एण्ड जर्कमा गरेर कुल १४५ केजी भार उठाएर कीर्तिमान बनाएकी थिईन् । त्यसबेला कमलाले स्न्याचमा ६६ र क्लिन एण्ड जर्कमा ७९ केजी भार उठाएकी थिईन् ।

यस्तै ५३ केजीमा सन्जु चौधरीले सातौ राष्ट्रिय खेलकुदमा देवी चौधरीले बनाएको राष्ट्रिय कीर्तिमान भंग गरिन् । सन्जुले स्नयाचमा ६० केजी तौल र क्लिन एण्ड जर्कमा ८० केजी भार उठाउदै कुल १४० केजी भार उठाउदै नयाँ कीर्तिमान बनाएकी हुन् । देवीले सातौ राष्ट्रिय खेलकुदमा स्न्याचमा ५९ केजी तथा किल्न एण्ड जर्कमा ७९ केजी गरी १३८ केजी भार उठाएकी थिईन् । उनले पनि कमलजस्तै तिनै विधाको कीर्तिमान तोडेकी हुन्।

यस्तै महिला जुनियरतर्फको ५३ केजी तौल समूहमा कविता चौधरीले स्न्याचमा ४१ केजी र क्लिन एण्ड जर्कमा ५० केजी गरी कुल ९१ केजी भार उठाईन् । टिकामाया गुरुङले स्न्याचमा ४५ तथा क्लिन एण्ड जर्कमा ५५ गरी कुल १०० केजी भार उठाईन् ।

युथ र जुनियरको पुरुष र महिलामा समान ८–८ गरी जम्मा ३२ तौलसमूहमा प्रतिस्पर्धा भैरहेको छ । प्रतियोगिता साउन १३ गतेसम्म चल्नेछ ।