पोखरा (हाम्रो खेलकुद)– पोखरामा पहिलो पटक नेट बल भित्रिएको छ । नेपाल नेट बल संघले पश्चिमाञ्चल क्षेत्रलाई केन्द्रित गर्दै यो खेलको विस्तार गर्न पोखरामा प्रशिक्षण प्रारम्भ गरेको हो । विशेष गरि महिलाहरुलाई केन्द्रित गरि सुरु गरिएको नेट बल खेल प्रशिक्षणमा ४० जनाको सहभागिता रहेको छ ।

प्रशिक्षणको उद्घाटनमा वोल्दै पश्चिमाञ्चल क्षेत्रिय खेलकुद विकास समितीका उपाध्यक्ष सुनिल गुरुङले नेट बलको खेलले यस क्षेत्रका महिलाहरुको शसक्तिकरणमा राम्रो भुमिका खेल्न सक्ने बताए । उनले शारिरिक स्वस्थका साथै खेलकुदमा महिलाहरुको सहभागिता वढाउन यस खेलले योगदान दिने बताए ।

नेपाल नेट वल संघका अध्यक्ष विर वहादुर तामाङको अध्यक्षतामा भएको कार्यक्रममा संघका महासचिव दिपक लामाले पोखरामा नेट बलको प्रशिक्षण चार दिन सम्म चल्ने जानकारी दिए । सन् १८०० मा अमेरिका बाट सुरु भएको नेट बल अधिंकाश देशहरुमा खेल्ने गरिन्छ सन् १९९५ मा ओलोम्पिकले मान्यता दिएको हो । नेपालमा ६ वर्ष अघि भित्रिएको नेटबल खेल राजधानी केन्द्रित रहे पनि अब यसलाई नेपालभर खेल्नका लागि प्रशिक्षकहरुलाइ प्रशिक्षित गराउन सुरु गरिएको महासचिव लामाले वताए ।
१ सय फिट लम्बाई र ५० फिट चौडाई रहेको खेल मैदान खेल्न सकिने यो खेल इनडोर गेम हो भने यसमा ७/७ जना खेलाडी खेल्न सक्ने छन् । विशेष गरि महिलाहरुको लागि भनिएको यो खेल अहिले पुरुषहरु समेतको सहभागिता रहने गरेको लामाले बताए । उनका अनुसार नेपालले सन् २०१२ र २०१३ को एशियन नेट बल च्याम्पियनसिपमा सहभागिता जनाइसकेको छ ।

हाल नेपालमा यो खेलका ४० जना प्रशिक्षकहरु रहेका छन् भने खेल विस्तारका लागि विद्यालय केन्द्रित गरिएको छ । पोखरामा साउन २ गते सम्म संचालन हुने प्रशिक्षणमा अष्ट्रेलियन प्रशिक्षक स्टेफेनी एन्डरशनले समेत प्रशिक्षण दिने बताइएको छ ।