काठमाडौं (हाम्रो खेलकुद) – नेपालकी लक्ष्मी मगरले श्रीलंकामा माउन्टेन बाइक स्टेज रेसको महिलातर्फको उपाधि जितेकी छिन् । दी याक एट्या फिल इभान्सको आयोजना तथा श्रीलंका एयरलायन्सको प्रायोजनमा भएको श्रीलंका होलिडेज रम्बल इन द जंगल २०१७ मा लक्ष्मी पहिलो भएकी हुन् ।

२ सय ७२ किलोमिटरको ४ दिने रेस २० घन्टा २० मिनट १८ सेकेन्डमा पुरा गर्दै उनी पहिलो भएकी थिइन् । रेसको कोर्स जंगल, उवडखावड, चिया बगान, ओरालो भिरालो, नदि, झरना आदि विभिन्न प्राकृतिक बातावरणीय कठिनाई रहेको लक्ष्मीले बताइन् ।

रेस जेठ ३० देखि असार ३ गते सम्म सञ्चालन भएको थियो । अस्ट्रेलियाकी तानिया थाइरोन २१ घन्टा ३९ मिनट ११ सेकेन्डका साथ दोश्रो र फ्रान्सकी क्लेयर डरमारक्वेट २२ घन्टा ५३ मिनट ०४ सेकेन्डका साथ तेश्रो भएकी थिइन् ।समग्रमा भने लक्ष्मी १३ औं भएको थिइन् ।

लक्ष्मीले कुल १२ सय १० अमेरिकी डलर प्राप्त गरेकी थिइन् । लक्ष्मीका अनुसार विजेता बने वापत १ हजार, पहिलो स्टेजको ७५ डलर, दोस्रो स्टेजको ३०, तेस्रोको ७५ र चौथो स्टेजको ३० अमेरिकी डलर प्राप्त गरेकी थिइन् ।

पुरुषतर्फ रेसमा दाबेदार मानिएका अजय पण्डित क्षेत्रीले भने रेसको पहिलो स्टेजमै छोडेका थिए । रेसका दौरान टाउको दुखेपछि अजय ४२ किलोमिटरपछि उनले रेस त्यागेका थिए ।

पुरुषमा क्यानडाका कोरी कालेस (१३ घन्टा ८ मिनेट ४५ सेकेन्ड), विजयी भएका थिए । बेलायतका निक क्रेग (१३ घन्टा २४ मिनेट ३४ सेकेन्ड ) दोस्रो र एकलेक सैन्डर गिल्हर (१३ घन्टा ५० मिनेट ५० सेकेन्ड) तेस्रा भएका थिए । प्रतियोगितामा १४ देशका ३८ जनाले प्रतिस्पर्धा गरेका थिए ।