काठमाडौँ (हाम्रो खेलकुद) – सुर्य नेपाल गल्फ टुर २०१६/१७को चौथो इभेन्ट अन्तर्गत सोमबारबाट पार-७२ गोकर्ण गल्फ क्लबमा  सुरु भएको सुर्य नेपाल सेन्ट्रल ओपनको पहिलो चरणमा एमेच्योर गल्फर तेन्जिङ छिरिङले अग्रता लिएका छन्।

राष्ट्रिय गल्फ टोलीका सदस्य रहेका तेन्जिङले ६अन्डर ६६ को स्कोर बनाउदै तालिकाको शिर्ष स्थानमा रहन सफल भएका हुन्। तेन्जिङले दुवै हाफमा ३ अन्डर ३३को स्कोर बनाएका थिए। तेश्रो र सातौँ होलमा इगल बनाएका तेन्जिङले चौथो होलमा १ सट खर्चेका थिए ब्याक नाइनमा तेन्जिङले ११औं, १२औं र १५औं होलमा बर्डी बनाए।

तेन्जिङले दोश्रो स्थानमा रहेका व्यावसायिक गल्फर भुवन नगरकोटी र संजय लामा भन्दा चार स्ट्रोक कम खेलेका छन्। नगरकोटी र लामाको २ अन्डर ७०को स्कोर रहेको छ। चौथो स्थानमा रहेका रबि खड्काले १ अन्डर ७१को स्कोर बनाए।

नेपालका नम्बर एक व्यवसायिक गल्फर शिवराम श्रेष्ठ १ ओभर ७३ स्कोर जोड्दै बलभद्र राइसंग पाँचौ स्थानमा रहेका छन्। शिर्ष स्थानमा रहेका तेन्जिङले इगल हानेको सातौँ होलमा शिबरामले डबल बोगी खेपेका थिए। सातौं स्थानमा दिपक आचार्य ( २ ओभर ७४) रहेका छन् भने ३ ओभर ७५ जोडेका एमेच्योर टंक बहादुर कार्की व्यवसायिक गल्फरहरु राजेन्द्र श्रेष्ठ प्रधान, जयराम श्रेष्ठ र धन बहादुर थापासंगै सामुहिक आठौँ स्थानमा रहेका छन्।

प्रतियोगितामा ३३ व्यवसायिक र १५ एमेच्योर गल्फरले सहभागिता जनाएका छन्। कुल ६ लाख पुरस्कार रहेको प्रतियोगिताको विजेताले रु.१,१०,००० पाउने छ  भने दोश्रो र तेश्रो हुनेले रु.७०,००० र रु. ४५,००० पाउनेछन्। अन्य २१ उत्कृष्ट खेलाडीलाई पनि नगद पुरस्कार प्रदान गरिनेछ।