काठमाडौं (हाम्रो खेलकुद)- नेपालले ३८औं बंगलादेश एमेच्योर गल्फ च्याम्पियनसिपको टिम इभेन्टमा स्वर्ण पदक जितेको छ।

नेपाल नम्बर एक एमेच्योर गल्फर सदभाव आचार्य र राहुल विकेको जोडीले बिहीवार इभन-पार २८८ स्कोर गर्दै स्वर्ण जितेका हुन। बंगलादेशको ‘बी’ टिमलाई १६ स्ट्रोकको फराकिलो अन्तरमा हराउँदै नेपालले प्रभावशाली जित निकालेको हो।

सदभावले लगातार दोस्रो दिन ३-अन्डर ६९ को स्कोर निकाल्दा राहुलले ४-ओभर ७६ मा दोस्रो दिनको खेल सकाए।

आज नेपालले १-ओभर १४५ को स्कोर दर्ज गर्यो। पहिलो दिन नेपालले १-अन्डर १४३ बनाएको थियो। सदभावले टिमतर्फ स्वर्ण जितेको यो दोस्रो पटक हो। यसअघि ३६ औं संस्करणमा सुवास तामाङसँग मिलेर स्वर्ण पदक हात पारेका थिए।

बंगलादेशको ‘बी’ टिमका शफिकुल इस्लाम र रोमन मियाको जोडीले १६-ओभर ३०४ स्कोरसहित रजत पदक प्राप्त गर्यो। यो जोडीले आज १०-ओभर १५४ स्कोर गर्यो। अशफिकुलले आज ४-ओभर ७६ र रोमनले ६-ओभर ७८ मा खेल सकाएका थिए।

बंगलादेशको ‘ए’ टिमका अबु बकर सिद्दिकी र मोहम्मद साहबुद्धिनले कास्य पदक प्राप्त गरे। उनीहरूले कुल १८-ओभर ३०६ को स्कोर निकाले।

सदभावलाई ८ स्ट्रोकको अग्रता
पहिलो दिनका लिडर सदभावले दोस्रो दिन पनि ३-अन्डर ६९ स्कोर दर्ज गर्दै समग्रमा ६-अन्डर १३८ स्कोर सहित ८ स्ट्रोकको अग्रतामा शीर्षस्थानमा कायमै रहे।

बंगलादेशका मोहम्मद साहबुद्धिन समग्रमा २-ओभर १४६ स्कोरमा दोस्रो स्थानमा छन्। सदभावले आज १०औँ होलबाट खेलको सुरूवात गरे।

फ्रन्ट नाइनमा २-अन्डर ३४ मा सकाउने क्रममा १०औँ र ११औँ होलमा बर्डी प्रहार गरे। १४औँ होलमा बोगी खेप्दा १७औँ होलमा एक सट बचाए। उनके ब्याक नाइनमा १-अन्डर ३५ को स्कोर निकाले।

तेस्रो होलमा बर्डी प्रहार गरेपनि चौथो होलमा डबल बोगीको सामना गरे। यसपछि पाँचौँ र नवौँ होलमा बर्डी प्रहार गरे। उनले पहिलो दिन बोगी रहित ३-अन्डर ६९ स्कोर गरेका थिए।

दोस्रो स्थानमा रहेका साहबुद्धिनले आज २-ओभर ७४ को स्कोर निकाले। श्रीलंकाका चुलिथा पुष्पिका तेस्रो स्थानमा छन्। उनले आज ३-ओभर ७५ खेल्दै समग्रमा ५-ओभर १४९ स्कोर गरे।

अर्का नेपाली गल्फर राहुल विके र बंगलादेशका शफिकुल सम्युक्त चौंथो स्थानमा रहेका छन। राहुल र शफिकुल दुबैले आज ४-ओभर ७६ खेल्दै ६-ओभर १५० को स्कोर दर्ज गरे। कूल १०० खेलाडी मध्य उत्कृष्ट ५२ गल्फरले अन्तिम दुई दिनको लागी स्थान सुरक्षित गरे।