दसौं राष्ट्रिय खेलकुदको लागि सचिवालय उद्घाटन

काठमाडौं (हाम्रो खेलकुद)- कर्णाली प्रदेशमा हुने दसौं राष्ट्रिय खेलकुदको सचिवालय उदघाटन गरिएको छ। त्रिपुरेश्वरस्थित राष्ट्रिय खेलकुद परिषद (राखेप) मा बुधवार युवा तथा खेलकुद मन्त्री तेजुलाल चौधरीले सचिवालयको उद्घाटन गरे।

राखेपले दसौं राष्ट्रिय खेलकुद चैत २३ गते देखि ३० गतेसम्म कर्णाली प्रदेशमा गर्ने गरि मन्त्री परिषदलाई सिफारिस गर्ने निर्णय गरेको थियो ।

सचिवालयको उद्घाटन गरेपछि मन्त्री चौधरीले एक टोली छिट्टै कर्णाली प्रदेश भ्रमणमा जाने र त्यहाँको भौतिक संरचना लगायतका सुविधा निरीक्षण गरेर के कति खेल गर्न सकिन्छ टुंगो लगाउने बताए।

केहि खेल नेपालगञ्जमा गर्न सकिने पनि चौधरीले जानकारी दिए। राखेप सदस्य सचिव टंक लाल घिसिङले ३५ खेल दसौं खेलकुदमा समावेश गरिने निश्चित भैसकेको बताए।

नवौं राष्ट्रिय खेलकुदमा समावेश कुल ३६ मध्ये पारा ग्लाइडिङ बाहेक ३५ खेललाई निरन्तरता दिइने पनि बताए। तर कुल खेलसँगै कति खेल कहाँ हुने यसको निर्णय माघ ३ गतेको बोर्ड बैठकले तय हुनेछ। २४ खेल कर्णालीमा हुने संभावना रहेको बताइएको छ।

सचिवालयमा आवश्यकता अनुसार परिषदका कर्मचारीले काम गर्ने पनि सदस्य सचिव घिसिङले बताए।