काठमाडौं (हाम्रो खेलकुद)- बंगलादेश एमेच्योर गल्फ च्याम्पियनसिपको ३८औं संस्करणको पहिलो दिन बुधवार नेपालका सदभाव आचार्य शीर्ष स्थानमा रहेका छन्।

३-अन्डर ६९ उत्कृष्ट स्कोर सहित सदभाव शीर्षस्थानमा रहन सफल भएका हुन्। उनले आयोजक बंगलादेशका मोहम्मद शाहबुद्दिनलाई ३ स्ट्रोकले पछि पारे।

ढाकास्थित कुर्मितोला गल्फ क्लबमा आज सुरु भएको प्रतियोगितामा युवा गल्फर सदभावले बोगी रहित राउन्ड खेले। पहिलो १० होलमा लगातार पार बचाएपछि उनले ११औं, १३औं र १७औं होलमा बर्डी प्रहार गरे।

बंगलादेशका शाहबुद्दिन इभन-पार ७२ सहित दोस्रो स्थानमा रहे। २-ओभर ७४ को स्कोर सहित चार खेलाडी, नेपालका राहुल विके, श्रीलंकाका चकिथा पुष्पिका र बंगलादेशका सफिकुल इस्लाम र मोहम्मद समिम संयुक्तरुपमा तेस्रो स्थानमा रहेका छन्।

राहुलले फ्रन्ट नाइनमा तीन बर्डी र तीन बोगीसहित इभन-पार ३६ खेले। उनले दोस्रो, छैटौं र नवौं होलमा बोगी खेपे। तेस्रो, पाँचौं र सातौं होलमा बर्डी प्रहार गरे। राहुलले १०औं र १७औं होलमा एक-एक सट खेर फाल्दै ब्याक नाइन २-ओभर ३८ मा पूरा गरे।

टिम इभेन्टमा नेपालका सदभाव आचार्य र राहुल विकेको जोडी १-अन्डर १४३ को स्कोरमा शीर्षस्थानमा छ। नेपालले बंगलादेशको ‘ए’ टिमलाई पाँच स्ट्रोकले पछि पारेको छ।

बंगलादेशको ‘ए’ टिमका अबु बकर सिद्दिकी र मोहम्मद शाहबुद्दिनको टिमले ४-ओभर १४८ स्कोर बनाएको छ। बंगलादेशको ‘बी’ टिमका सफिकुल इस्लाम र रोमन मिया ६-ओभर १५०को स्कोरसहित तेस्रो स्थानमा रहे।

४ दिने प्रतियोगितामा १ सय खेलाडीको सहभागिता छ। टिमतर्फ ८ टिमले दाबेदारी प्रस्तुत गरेका छन्। टिमतर्फको विजेताको निर्णय ३६ होलको समाप्तिमा हुनेछ।