इन्डो नेपाल भलिबलको समिफाइनल समीकरण पूरा

सुमन अधिकारी, बुटवल

बुटवलमा जारी ‘मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१’ को सेमिफाइनल समीकरण पूरा भएको छ ।

समूह चरणका २ खेल बाँकी रहँदा‌ नै सेमिफाइनल पुग्ने टोलीको टुंगो लागेको छ। समूह ‘ए’ बाट नेपाल पुलिस क्लब र मणिमुकुन्द तथा समूह ‘बी’ बाट त्रिभुवन आर्मी क्लब र भारतको गुजरात भलिबल‌ एसोसिएसन अन्तिम चारमा पुगेका हुन्।

गुजरातले आइतवार दोस्रो खेलमा गल्कोट भलिबल क्लबलाई ३-० को सोझो सेटमा हराएको हो । गुजरात २५-१८, २५-१९ र २५-१६ को सोझो सेटमा विजयी भयो ।

दिनको पहिलो खेलमा आयोजक मणिमुकुन्द भलिबल क्लबले आयोजक मदन भण्डारी स्पोर्टस एकेडेमीलाई‌ २५–२०, १८–२५, २५–१२, २१–२५ र १५–१२ को सेटमा हराउँदै सेमिफाइनल पुगेको थियो।

प्रतियोगितामा सोमवार समूह एमा जसमा पुलिस र रुकुम पश्चिम तथा समूह ‘बी’मा आर्मी र एपिएफबिच प्रतिस्पर्धा हुनेछ।