ललितपुर (हाम्रो खेलकुद )- आयोजक ललितपुर स्पोर्टस क्लब र थापाथली चेस पार्क क्लब सातौं तुल्सीलाल स्मृति राष्ट्रिय टिम क्लब चेस च्याम्पियनसिपको फाइनलमा पुगेका छन्।

सेमिफाइनलमा आइतवार आयोजक टोलीले ललितपुर महानगरपालिकालाई २.५-१.५ अंकले तथा थापाथलीले साविक विजेता दोलखा चेस होमलाई ३.५- ०.५ अंकले पराजित गर्दै फाइनल भेट पक्का गरेका हुन्।

तेस्रो बोर्डमा खेलेका पूर्व  नेपाल च्याम्पियन फिडे मास्टर क्षितिज भण्डारी उत्कृष्ट लयमा रहेका आयोजक क्लबका रिसोन थापासँग पराजित भए‌ । रिसोनले १ अंक जोड्दा फिडे मास्टर रुपेश जैशवाल र सिएम सजिन महर्जनले बराबरी खेले।

त्यसपछि आयोजक टिमको तर्फबाट  दोस्रो बोर्डमा खेलेका शैलेन्द्र न्यौपाने र चौथो बोर्डमा खेलेकी विनिता कपालीले आ आफ्नो खेल बराबरीमा टुंगाए ।

थापाथली चेसकी महिला च्याम्पियन सिन्दिरा जोशीले निर्णायक खेलमा दोलखाकी पूजा भण्डारीलाई‌ हराइन् ।
त्यसअघि थापाथलीका रिजेन्द्र राज भण्डारी र राजन सुवेदी, सुशील चौधरी र सुश्रत दाहालको खेल बराबरीमा टुंगियो ।

ललितपुर स्पोर्ट्स क्लब र नेपाल बुद्धिचाल महासंघको संयुक्त आयोजनामा जारी प्रतियोगितामा ४ लाख ३७ हजार रुपैयाँ पुरस्कार रहेको छ।

विजेता टोलीले २ लाख, दोस्रोले १ लाख २० हजार , तेस्रोले ८० र चौथो टोलीले ४० हजार रुपैयाँ प्राप्त गर्नेछ।
प्रत्येक बोर्डमा उत्कृष्ट स्थान प्राप्त गर्ने खेलाडीले जनही १० हजार रुपैयाँ पाउनेछन्।