काठमाडौं (हाम्रो खेलकुद)- युएईमा भएको २८औं संस्करणको फाल्डो जुनियर टुर युरोप ग्रान्ड फाइनल अन्तर्गत यु-२१ तर्फको उपाधि विजेता नेपालका नम्बर एक एमेच्योर गल्फर सदभाव आचार्यलाई नेपाल गल्फ संघले सम्मान गरेको छ।

राजधानीमा मंगलवार आयोजित कार्यक्रममा राष्ट्रिय खेलकुद परिषद (राखेप) का सदस्य सचिव टंकलाल घिसिङले सदभावलाई सम्मान पत्र र ७५ हजार रुपैयाँ सहित सम्मान गरे।

नेपाली खेलाडीले फाल्डो सिरिज अन्तर्गत ग्रान्ड मास्टर फाइनलमा उपाधि जितेको यो पहिलो पटक हो। सदभाव ओभरअलतर्फ दोस्रो भएका थिए।

युएईको आबुधाबीस्थित अल आइन इक्वेसटेरियन, सुटिङ एण्ड गल्फ क्लबमा भएको प्रतियोगितामा समग्रमा ५-अन्डर २०५ स्कोर गर्दै सदभावले उपाधि जितेका थिए। उनले डेनमार्कका भिक्टोर कोफोड उसलेनलाई २ स्ट्रोकले हराउँदै पहिलो पटक नेपाललाई उपाधि जित्दै इतिहास बनाएका थिए।

गल्फ संघले फाल्डो जुनियर टुर नेपाल च्याम्पियनसिप आयोजना गर्न सन् २०१२ देखि सुरु गरेको हो। १२ वर्षमा पहिलो पटक नेपालले ग्रान्ड फाइनलमा उपाधि जितेको हो।

सदभावले सम्मानका लागि गल्फ संघ, सहयोगका लागि राखेप, परिवार , प्रशिक्षकलाई धन्यवाद दिए ।सदभावलाई यो सफलताको लागि बधाई दिंदै सदस्य सचिव घिसिङले नेपाली गल्फ र सदभावलाई राखेपले सक्ने सहयोग गर्ने बताए।

एमेच्योर गल्फ वरियतामा अंक जोडिने यो प्रतियोगिता जितेपछि सदभावको विश्व वरियतामा पनि सुधार भएको छ। उनी ५२ स्थान माथी उक्लदै ३१४ औं स्थानमा उक्लिएका छन्।

गल्फ संघका अध्यक्ष टासी घलले सदभावको सफलतामा परिवारको ठूलो साथ रहेको भन्दै संघको‌ तर्फबाट बधाई दिए । एसियाली खेलकुदको‌ तयारी मिसन २०२६ मा गल्फलाई पनि समावेश गरेकोमा राखेपलाई धन्यवाद दिए।