काठमाडौं (हाम्रो खेलकुद)- जयराम श्रेष्ठ ४-अन्डर ६४ को उत्कृष्ट स्कोरमा सूर्य नेपाल काठमाडौं ओपनको पहिलो दिन मंगलवार शीर्षस्थानमा रहेका छन्।

पहिलो १८ होलको समाप्तीमा जयरामले विष्णु प्रसाद शर्मा र साविक विजेता निरज तामाङलाई एक स्ट्रोकले पछि पारे।

रोयल नेपाल गल्फ क्लबका घरेलु प्रो जयरामले बोगी रहित स्कोर कार्ड तयार पारे। उनले आज कुल चार बर्डी प्रहार गरे।

चौथो र आठौं होलमा बर्डी प्रहार गर्दै फ्रन्ट नाइन २-अन्डर ३२ मा सकाए। यसपछि दशौं र बार्ह्रौं होलमा पनि एक-एक सट बचाए र ब्याक नाइन पनि २-अन्डर ३२ मा नै पुरा गरे।

विष्णु र निरज ३-अन्डर ६५ सहित पहिलो दिन संयुक्तरुपमा दोस्रो स्थानमा रहे। विष्णुले पहिलो र सातौं होलमा एक-एक सट बचाउँदै फ्रन्ट नाइन २-अन्डर ३२ मा सकाए। यसपछि ११औं होलको बोगी विरूद्ध १२औं र १३औं होलको दुई बर्डीले ब्याक नाइन १-अन्डर ३३ मा पुरा गरे।

निरजले दोस्रो होलमा बोगी प्रहार गरेपनि चौथो र पाँचौँ होलमा लगातार दुई बर्डी प्रहार गरे। फ्रन्ट नाइन १-अन्डर ३३ मा पुरा गरे। यसपछि १०औं र ११औं होलमा एक-एक सट बचाउँदै ब्याक नाइनमा २-अन्डर ३२ को स्कोर दर्ज गरे।

३२ प्रो गल्फरले ७ लाख ३५ हजार रुपैयाँ पुरस्कारको लागि प्रतिस्पर्धा गरिरहेका छन्। विजेताले उपाधिसँगै १ लाख ५० हजार प्राप्त गर्नेछन्। दोस्रोले ८५ र तेस्रोले ६८ हजार रुपैयाँ हात पार्नेछन् । साथै कट बनाउने २१ प्रो गल्फरले पनि नगद पुरस्कार प्राप्त गर्नेछन्। ३६ होलको समाप्तीमा कट लागू हुनेछ।