काठमाडौं (हाम्रो खेलकुद) – अर्को साता सुरु हुने काभा पुरुष क्लब भलिबल च्याम्पियनसिपको प्रत्यक्ष प्रसारण हाम्रो खेलकुदले गर्ने भएको छ ।

नेपाल भलिबल संघ र हाम्रो खेलकुदबीच प्रत्यक्ष प्रसारणको‌ लागि बुधबार सम्झौता भएको छ । भलिबल संघका अध्यक्ष जितेन्द्रबहादुर चन्द र हाम्रो खेलकुदका सम्पादक प्रकाश तिमल्सिनाले सम्झौता पत्रमा हस्ताक्षर गरे ।

सेन्ट्रल एसिया भलिबल एसोसिएसन (काभा) को कार्यक्रम अनुसार हुने क्लब च्याम्पियनसिप मंसिर २२ देखि २९ गतेसम्म त्रिपुरेश्वरस्थित राष्ट्रिय खेलकुद परिषद् (राखेप) कभर्ड हलमा हुनेछ ।

च्याम्पियन्सिपमा नेपालका दुई टोलीसहित कम्तिमा ५ टोलीको सहभागिता निश्चित भइसकेको संघका अध्यक्ष चन्दले जानकारी दिए ।

नेपालबाट आठौं प्रधानमन्त्री कप एनभिए लिगको विजेता टिप टप हेल्प स्पोर्टस क्लब र उपविजेता गण्डकी प्रदेशले प्रतिस्पर्धा च्याम्पियनसिपमा भाग लिनेछन् । प्रतियोगिताका लागि हेल्प नेपालले विभिन्न विभागका खेलाडी समेट्दै टोली निर्माण गर्दैछ । गण्डकीले पनि तयारी सुरू गरेको छ, यद्यपि टोली भने सार्वजनिक गरेको छैन ।

हेल्प नेपालबाट कप्तान टोपबहादुर थापा (दीपक), सन्जु विक्रम शाह, सुभाष कुँवर, रविन चन्द, धनबहादुर भट्ट, सफल विक, सुरेन्द्र बम, चिरन खड्का र मनिष मानन्धर खेल्ने पक्का भइसकेको छ । टोलीको प्रशिक्षकमा उत्सव खड्का रहेका छन् ।