कन्चनपुर (हाम्रो खेलकुद)– दोश्रो राष्ट्रिय र्यापिड रेटिङ्ग बुद्धिचाल प्रतियोगिता कञ्चनपुर जिल्लाको बेदकोट नगरपालिकामा मंगलवार सुरु भएको छ । राष्ट्रिय बुद्धिचालका शीर्ष ६३ खेलाडी सहभागी रहेको प्रतियोगितामा बाँकी ४ चरणका खेल बुधवार हुनेछन् ।

नेपाल बुद्धिचाल महासंघ र काठमाडौं स्पोर्ट्स एकेडेमीको संयुक्त आयोजनामा भएको प्रतियोगिताको पहिलो दिन पाँचौ चरणका खेल सम्पन्न भएका छन् । एफएम क्षितिज भण्डारीले सबै खेल जित्दै ५ अंकका साथ शीर्षस्थानमा छन् ।

आशिष फुयाल र सिएम शुश्रुत दहाल समान ४.५ अंक बनाउदै संयुक्तरुपमा दोस्रोमा छन् । छैटौं चरणमा आशिषले सुरज महर्जन तथा शुश्रुतले क्षितिजसँग खेल्नेछन् ।

सुजन काफ्ले, सुरज महर्जन, प्रकाशचन्द्र नेपाल, राजन सुवेदी , सिएम नवीन तण्डुकार र पुरुषोत्तम सिलवाल समान ३.५ अंकसहित तेस्रो स्थानमा छन् । दसौं स्थानसम्म प्राप्त गर्ने खेलाडीले नगद पुरस्कार प्राप्त गर्नेछन् ।

र्यापिड प्रतियोगिता सहभागी मध्ये शीर्ष ३ महिला, स्थानीय, ५५ वर्ष माथिका भेट्रान, रेटिङ १७ सय मुनि, उत्कृष्ट अनरेटेड, उत्कृष्ट जुनियर वर्ष १२, १४,१६ ले नगद पुरस्कार प्राप्त गर्नेछन् ।

मध्यम गतिमा खेलिने ¥यापिड खेलको लागि हरेक खेलाडीले १५ मिनेट पाउने छ भने प्रत्येक चालमा १० सेकेण्ड थपिनेछ ।