काठमाडौं (हाम्रो खेलकुद)- फिलिपिन्सले एसिया रग्बी इमिरेट्स सेभेन्स ट्रफी– २०२४ मा दोहोरो उपाधि जितेको छ।

चाइनिज ताईपेईलाई पराजित गर्दै फिलिपिन्सले पुरूषतर्फको उपाधि जितेको हो । त्रिपुरेश्वरस्थित दशरथ रंगशालामा शनिवार भएको फाइनलमा चाइनिज ताइपेईलाई २७-१४ को स्कोरले पराजित गर्दै उपाधि हात पारेको हो ।

खेलको सुरूआतदेखि नै चाइनिज ताइपेईलाई फिलिपिन्सले दबाबमा राख्न सफल भएको थियो । उक्त दबाब अन्तिमसम्म कायम राख्दै फिलिपिन्स विजेता बन्यो ।

यसैगरि भारतलाई पराजित गर्दै फिलिपिन्सले महिलातर्फको उपाधि जितेको छ । भारतलाई ७- ५ को स्कोरले पराजित गर्दै फिलिपिन्सले उपाधि हात पारेको हो ।

इन्डोनेसियालाई पराजित गर्दै गुआमले भने एसिया रग्बी इमिरेट्स–२०२४ मा तेस्रो स्थान हात पारेको छ । गुआमले इन्डोनेसियालाई २२–१९ ले पराजित गरेको हो ।

इन्डोनेसियाले सुरूआतीदेखि नै गुआमसँग प्रतिस्पर्धात्मक खेल पस्किएको थियो । सेमिफाइनलमा फिलिपिन्ससँग इन्डोनेसिया १९–१० ले पराजित भएको थियोे । गुआम भने भारतसँग २४–७ ले पराजित हुन पुग्यो ।
‘च्यालेन्ज थर्ड’ मा नेपाल पराजित
नेपालको पुरूष तर्फ ‘च्यालेन्ज थर्ड’ मा पराजित भएको छ । त्रिपुरेश्वरस्थित दशरथ रंगशालामा शनिबार भएको खेलमा अफगानिस्तानसँग नेपाल २२–५ को स्कोरमा पराजित भएको हो ।

एक समय नेपालले खेलमा पुनरागमन गरिसकेको थियो । त्यतिखेर नेपाल र अफगानिस्तानको स्कोर ५–५  थियो ।

नेपाल त्यही ५ स्कोरमा रोकिँदा अफगानिस्तानले भने थप १७ स्कोर जोड्यो । योसँगै नेपाल २२–५ को स्कोरमा पराजित हुन पुग्यो । यसअघि नेपाल ‘च्यालेन्ज’ मा कतारसँग ३३–० ले पराजित भएको थियो ।

दुई दिन सम्म सन्चालन भएको प्रतियोगिताको विजेतालाई राष्ट्रिय खेलकुद परिषद्का सदस्य–सचिव टंकलाल घिसिङ, नेपाल ओलम्पिक कमिटीका महासचिव निलेन्द्रराज श्रेष्ठ, नेपाल रग्बी संघका अध्यक्ष दीपक देवकोटाले पुरस्कृत गरेका थिए ।