काठमाडौं (हाम्रो खेलकुद) – काठमाडौं स्पाइकर्सले वात्सल्य एभरेस्ट महिला भलिबल लिग (इडब्लुभिएल) मा पहिलो जित हासिल गरेको छ ।

त्रिपुरेश्वरस्थित राष्ट्रिय खेलकुद परिष्द् (राखेप) कभर्डहलमा मंगलवार सम्पन्न खेलमा काठमाडौंले चितवन शक्तिलाई पराजित गरेको हो ।

काठमाडौंले चितवनमाथि ३-१ को सेटमा जित निकाल्यो । पहिलो सेट २१-२५ ले गुमाएको काठमाडौंले त्यसपछिका लगातार तीन सेटमा जित निकाल्दै महत्वपूर्ण ३ अंक जोड्न सफल भयो । दोस्रो सेट २५-१०, तेस्रो सेट २५-२२ र चौथो सेट २५-१७ ले जितेको थियो ।

जितसँगै काठमाडौंले २ खेलबाट ३ अंक जोडेको छ । पहिलो खेलमा काठमाडौं ललितपुर क्विन्ससँग पराजित भएको थियो । पराजित चितवनको पनि २ खेलबाट समान ३ अंक रहेको छ । चितवनले पहिलो खेलमा गन्डकी थन्डर्सलाई पराजित गरेको थियो ।

आजै भएको पहिलो खेलमा कर्णाली यश्विजले लगातार दोस्रो जित हसिल गर्ने क्रममा गण्डकी थन्डर्सविरुद्ध ३-२ सेटको जित निकालेको थियो । पहिलो सेटमा गण्डकीले २५-१५ को सहज जित निकालेको थियो । त्यसपछिका दुई सेट २५-२२, २५-१७ ले आफ्नो पक्षमा पार्दै कर्णालीले २-१ को अग्रता लियो ।

चौथो सेटमा गण्डकी २५-१९ ले विजयी भएपछि खेल लम्बियो । पाँचौं तथा निर्णायक सेटमा १५-१२ को जित निकाल्दै कर्णालीले विजयी यात्रा कायम राख्यो । जितसँगै कर्णालीले दुई खेलमा पाँच अंक जोडेको छ । दुवै खेलमा पराजित गण्डकीको एक अंक छ ।

पहिलो खेलमा कर्णालीले मधेश युनाइटेडलाई पराजित गर्दा गण्डकीले चितवन शक्तिविरुद्ध हार बेहारेको थियो । आजको तेस्रो खेलमा ललितपुर क्विन्स र मधेश युनाइटेडबीच खेल हुँदैछ ।