चन्द नेतृत्वको उपसमितिले प्रतिवेदन बुझायो

काठमाडौं (हाम्रो खेलकुद)– नेपाल भलिबल संघका अध्यक्ष जीतेन्द्रबहादुर चन्दको संयोजकत्वमा गठित उपसमितिले भलिबल कभर्ड हल निर्माणका लागि सम्भावित जग्गाहरुको सुचीसहितको प्रतिवेदन राष्ट्रिय खेलकुद परिषद् (राखेप) लाई बुझाएको छ ।

एक महिनाको स्थलगत अध्ययनपछि तयार पारिएको प्रतिवेदन चन्द नेतृत्वको टोलीले आइतबार राखेप सदस्य सचिव टंकलाल घिसिङलाई बुझाएको छ । सदस्य सचिव स्तरीय निर्णयले चन्दको संयोजकत्वमा अन्तर्राष्ट्रिय भलिबल रेफ्री गौतम प्रसाद लासिवा र राखेपका इन्जिनियर शिवचन्द्र यादव सदस्य रहेको उपसमिति गठन भएको थियो ।

समितिले काठमाडौं, ललितपुर र भक्तपुरका विभिन्न स्थानको स्थलगत अध्ययन गरि प्रतिवेदन तयार गरेको बताइएको छ ।सदस्य सचिव घिसिङले समयमै प्रतिवेदन बुझाएकोमा उपसमितिलाई धन्यवाद दिदै प्रतिवेदनको सुझावलाई आधार मानेर प्रक्रिया अघि बढाइने बताएका छन् ।

प्रतिवेदनको अध्ययनपछि उपयुक्त विकल्पको छनोट गरि भलिबल संघको साथमा प्रक्रिया अघि बढाइने घिसिङले जानकारी दिए । राष्ट्रिय खेल घोषणा भएको ७ वर्ष नाघिसक्दा पनि नेपालमा अहिले सम्म एउटा पनि अन्तर्राष्ट्रिय स्तरको भलिबल कभर्ड हल निर्माण भएको छैन ।