काठमाडौं (हाम्रो खेलकुद)– नेपालका सिएम विवेक थिङले ओलम्पिक रिङ एक्स्ंपो क्लासिक बुद्धिचाल प्रतियोगितामा आफ्नो व्यक्तिगत रेटिङ १९.४ बढाएर २३०१.४ रेटिङ पु¥याउदै पर्फोमेन्सका आधारका नेपाल कै पहिलो फिडे मास्टरको टाइटल प्राप्त गरेका छन् ।

हंगेरी चेस फेडेरेसनको आयोजनामा सञ्चालन भइरहेको ओलम्पिक रिङ एक्स्पो क्लासिक बुद्धिचाल स्पर्धमा नेपालका क्याण्डिडेट मास्टर विवेकले एकल अग्रता कायम गरेका छन् । अन्तर्राष्ट्रिय प्रतियोगितामा रेटिङ २२८२ प्राप्त सिएम विवेकले चौथो चरणको खेलमा दोश्रो वरियताका २२७८ रेटेड हंगेरियन अन्तर्राष्ट्रिय मास्टर टर्जु अटिलालाई पराजित गरेका छन् ।

हंगेरीको बुढापेष्ट स्थित स्पोर्ट्स हलमा चलिरहेको अन्तर्राष्ट्रिय खुल्ला रेटिङ बुद्धिचाल प्रतियोगितामा नेपालका उच्च रेटेड खेलाडी सिएम विवेक शीर्ष वरियतामा रहेका छन् । विश्वका ११ राष्ट्र सहभागी प्रतियोगितामा चौथो चरण सम्म २६ अन्तर्राष्ट्रिय खेलाडीहरु प्रतिस्पर्धा गरिरहेका छन् ।

विवेकले पहिलो चरणमा जर्मनका हाहन निक्लासलाई , दोश्रो चरणमा हंगेरिका बाकी बेन्स र तेश्रो चरणको खेलमा अर्का हंगेरियन २११९ रेटेड अन्तर्राष्ट्रिय मास्टर मेस्जारोस आन्द्रासलाई हाराएका थिए ।

स्पर्धामा ४ चरणको खेल सकिदा सम्म विवेकले ४ अंक जोडेका छन् । दोश्रो स्थानका ३.५ अंक प्राप्त इटालिका २०७० रेटेड ला बार्बेरा मानफ्रेडि सँग विवेकले पाँचौ चरणमा प्रतिस्पर्धा गर्ने छन् । ३ अंकका साथ तेश्रो स्थानमा हंगेरिका मेस्जारोस आन्द्रास, युक्रेनका सज्तोज्का साज्दोर र युएईका सिएम मोहम्मद सइद लाइली छन् ।

नेपालका शीर्ष २२८२ रेटेड खेलाडी सिएम विवेकले यस प्रतियोगितामा २८५० रेटिङ्ग पर्फोमेन्स गरेका छन्। प्रतियोगिता ९ चरणको खेल हुनेछ । २१ सेप्टेम्बर सम्म चल्ने खेलमा नेपालका विवेक अष्ट्रेलियाबाट हंगेरी पुगेका थिए ।