काठमाडौं (हाम्रो खेलकुद)- दोस्रो प्रयागराज सिंह सुवाल स्मृति अन्तर वडा फुटसल प्रतियोगिताको सबै तयारी पूरा भएको छ ।

काठमाडौं महानगरपालिका वडा नं २३ को आयोजनामा असाज १ देखि ९ गतेसम्म लैनचौर फुटसल मैदानमा प्रतियोगिता हुँदैछ ।

प्रतियोगितामा काठमाडौं महानगरपालिका केन्द्रसहित ३१ वडाको सहभागिता रहनेछ । उद्घाटन खेल काठमाडौं महानगरपालिका र आयोजक २३ वडा बीच हुनेछ ।

आयोजक वडा नं २३ का अध्यक्ष मचाराजा महर्जनले आइतवार पत्रकार सम्मेलनमा नेपालमा फुटसलको व्यवसायिक प्रवद्र्धनमा योगदान गर्न र यसको माध्यमबाट खेलप्रति आम नागरिक र युवा वर्गलाई प्रेरित गराउन वडा स्तरबाटै यो फुटबल प्रतियोगितको आयोजना गर्न लागेको जानकारी दिए । उनका अनुसार प्रतियोगितामा ३ सय ८४ युवाले प्रत्यक्ष प्रतिस्पर्धा गर्ने र ५ सय युवा परिचालन हुनेछन् ।

नकआउटको आधारमा हुने प्रतियोगितामा विजेताले ट्रफीसहित २ लाख, दोस्रो टोलीले १ लाख रुपैयाँ प्राप्त गर्नेछ । यसैगरी, विधागततर्फ उत्कृष्ट हुने सर्वश्रेष्ठ खेलाडी, सर्वाधिक गोलकर्ता र सर्वश्रेष्ठ गोलरक्षकलाई जनही १० हजार रुपैयाँ प्राप्त गर्नेछन् ।

यस फुटसल प्रतियोगितालाई सफल पार्न वडा सदस्य गोलपाल नापितको संयोजकत्वमा सदस्यहरु राजेश मास्के, हरिओम श्रेष्ठ, प्रज्वल शाक्य र रामबहादुर रम्बा रजक रहेको मुल समिति गठन गरिएको छ ।

प्रतियोगितामा २० लाख रुपैयाँ खर्च हुने अनुमान छ ।
वडा न२३ को टिम टिमलाई जर्सी हस्तान्तरण पनि गरिएको थियो । विशाल श्रेष्ठको कप्तानीमा वडा न२३ प्रतियोगितामा सहभागी हुनेछ ।

स्टार हस्पिटलसँग सहकार्य

आयोजक वडा नं २३ र स्टार हस्पिटलबिच आइतवार नै प्रतियोगिताको मेडिकल साझेदारको सम्झौता पनि भएको छ । वडा नं २३ का अध्यक्ष मचाराजा महर्जन र स्टार हस्पिटलका अध्यक्ष किशोर महर्जनले सम्झौता पत्रमा हस्ताक्षर गरे ।