काठमाडौं (हाम्रो खेलकुद)- एनएसजेएफ–पल्सर स्पोर्ट्स अवार्ड २०८०’ को २१ औं संस्करणमा पनि अन्तर्राष्ट्रिय स्पोर्ट्स ब्रान्ड केल्मीको नेपालको आधिकारिक विक्रेता कामरु ट्रेडिङ प्रालिले सहप्रायोजनलाई निरन्तरता दिएको छ ।

नेपाल खेलकुद पत्रकार मञ्चको आयोजना नेपाल प्रज्ञा प्रतिष्ठानमा शुक्रवार हुने पल्सर स्पोर्ट्स अवार्डको सहप्रायोजनका लागि कामरुका प्रबन्ध निर्देशक उत्तम न्यौपाने र मञ्चका महासचिव प्रज्वल ओलीले सम्झौतापत्रमा मंगलवार हस्ताक्षर गरे ।

कामरुका निर्देशक न्यौपानेले स्पोर्ट्स अवार्डसँग पुनः सहकार्यको अवसरका लागि गर्न आभार व्यक्त गर्दै नेपाली खेलकुदको विकास र प्रबर्दधन कार्यमा आफ्नो तर्फबाट निरन्तर सहयोग रहने बताए ।

कामरु ट्रेडिङ प्रालि अन्तर्राष्ट्रिय स्पोर्ट्स ब्रान्ड केल्मीबाट उत्पादित सामग्रीको बिक्री–वितरण गर्ने नेपालको आधिकारिक संस्था हो ।

सह–प्रायोजक बनेवापत् केल्मी नेपालले अवार्डमा मञ्चका सदस्यका लागि केल्मी ब्रान्डको पोसाक उपलब्ध गराउने बताइएको छ।

पल्सर स्पोर्ट्स अवार्डअन्तर्गत ५ विधाको मनोनयन सार्वजनिक भइसकेको छ । यसपालि वर्ष खेलाडी पुरुष, महिला, युवा र प्रशिक्षक विधामा समान ५ खेलाडी/प्रशिक्षकको मनोनयन भइसकेको छ ।

त्यसमध्येबाट अवार्ड कार्यक्रमको दिन विजेता घोषणा हुनेछ । पिपल्स च्वाइस विधाको मनोनयन पनि सार्वजनिक भइसकेको छ ।

पिपल्स च्वाइस विधाको मनोनयनमा गुलसन झा (क्रिकेट), कविता भट्ट (भलिबल), मानमती विष्ट (कबड्डी), प्रीति राई (फुटबल) र श्रीराम श्रेष्ठ (रग्बी) रहेका छन् । उनीहरूको ई–सेवाबाट भोटिङ भइरहेको छ ।

त्यसबाहेक आयोजक मञ्चको आधिकारिक फेसबुक पेज र मुख्य प्रायोजक हंशराज हुलासचन्द कम्पनीको आधिकारिक फेसबुक पेज पल्सर बाट लाइक, सेयर र कमेन्ट गरेर पनि भोट गर्न सकिन्छ । त्यसबाहेक राष्ट्रिय खेलकुद संघका प्रमुख प्रशिक्षक र खेलकुद पत्रकार मञ्चका सदस्यले मत दिन पाउनेछन् ।