पोखरा (हाम्रो खेलकुद)- लामाचौर कप भलिबल प्रतियोगिताको पुरुषतर्फ नेपाल पुलिस क्लब च्याम्पियन बनेको छ ।

शनिवार भएको फाइनलमा एपिएफलाई ३-२ को सेटमा हराउँदै पुलिसले उपाधि जितेको हो । नव आदर्श सामुदायिक विकास समाजले आफ्नो वार्षिकोत्सव तथा हरितालिका तीजको अवसरमा लामाचौर कप राष्ट्रिय भलिबल च्याम्पियनसिपको आयोजना गरेको थियो ।

पुलिसले पहिलो सेट २५–१६ को सहज जित निकालेपनि दोस्रो सेटमा २१–२५ को हार व्यहोरेको थियो ।

तेस्रो सेटमा पुनः खेलमा फर्कदै पुलिसले २५–१९ को जित हासिल गर्यो । तर, चौथो सेटमा एपिएफ खेलमा फर्कदैँ २५–२२ को जित निकालेपछि खेल २–२ सेटको बराबरीमा पुगेको थियो ।

अन्तिम सेट समेत निकै रोमाञ्चक बन्यो । दुवै टिमले निकै संघर्ष गरेपनि अन्ततः नतिजा भने पुलिसको पक्षमा रह्यो ।

पुलिसले अन्तिम सेटमा १६–१४ को जित निकाल्दै उपाधि चुमेको हो । उपाधिसँगै पुलिसले १ लाख ५० हजार रुपैयाँ र एफिएफले १ लाख एक सय ११ रुपैयाँ हात प्राप्त गर्यो।

शुक्रबार फाइनल खेल खराब प्रकाश (लाइट प्रोटेस्ट) का कारण १–१ सेटको बराबरीमा रोकिएपछि शनिवार खेलाइएको थियो ।

पुलिसका सञ्जुविक्रम शाह प्रतियोगिताका सर्वोत्कृष्ट खेलाडी घोषित भए । उत्कृष्ट सेटर पुलिसका बलराम गुरुङ , उत्कृष्ट डिफेन्डर पुलिसका भिम गाहा, उत्कृष्ट ब्लकर पुलिसका सफल विक, उत्कृष्ट सर्भर एपिएफका हेमन्त मल्ल, उत्कृष्ट स्पाइकर एपिएफका विजय थापा पुलिसका चन्द्र कुवँर उत्कृष्ट प्रशिक्षक घोषित भए । विधागत उत्कृष्टले समान ५ हजार रुपैयाँ प्राप्त गरे ।

भदौ १९ गतेदेखि चलेको प्रतियोगिताको महिलातर्फको उपाधि भने एपिएफले उचालेको थियो । टोप टप न्यु डायमण्ड स्पोर्टस क्लबलाई लाई ३-१ ले हराउदै एपिएफ च्याम्पियन बनेको थियो। प्रतियोगितामस महिला/पुरुष तर्फ समान ४ टोलीको सहभागिता थियो।