काठमाडौं (हाम्रो खेलकुद) – सामाजिक संजालमा सक्रिय युवाहरुको समुह दारी ग्याङले यसै साता फुटसल प्रतियोगिता आयोजना गर्ने भएको छ।

बुढानिलकण्ठ-९ कपनमा रहेको कान्तिपुर ट्रेनिगं सेन्टरमा भदौ १४ र १५ गते फुटसल प्रतियोगिता आयोजना हुने मंगलवार पत्रकार सम्मेलनमार्फत जानकारी दिइएको छ ।

बिज एजुकेशन मुख्य प्रायोजक‌ रहेको प्रतियोगिताको मिडिया पार्टनर रुटिन अफ नेपाल बन्द रहेको छ । हाम्रो खेलकुद प्रतियोगिताको ब्रोडकास्टिङ पार्टनर रहेको छ ।

प्रतियोगितामा २४ देखि ३२ टोलीको सहभागिता रहने प्रतियोगितामा नेपाली नागरिक जो कोहीले टोलीकि दर्ता गर्न सक्नेछन् । टोली दर्ता शुल्क ५ हजार रुपैयाँ रहेको बताइएको छ।

प्रतियोगिताको विजेताले उपाधिसहित ५० र दोस्रो टोलीले ३० हजार रुपैयाँ प्राप्त गर्नेछन्। उत्कृष्ट खेलाडीले गोल्डेन बल, उत्कृष्ट गोलरक्षकले गोल्डेन ग्लोभ्स र उच्च गोलकर्ताले गोल्डेन बुटसहित समान ५ हजार रुपैयाँ पाउनेछन्।

‘परोपकारका लागि फुटसल’ भन्ने नाराका साथ आयोजना हुन लागेको प्रतियोगिताबाट बचत भएको रकम मार्फत सामाजिक कार्यक्रममा खर्च गरिने आयोजक समितिका सदस्य महेश्वर घिमिरेले बताए ।

२०७२ सालमा स्थापित दारी ग्याङमा दारी पाल्न रुचाउने र सामाजिक कार्यमा संलग्न युवाहरुको समूह हो । यद्दपी समूहमा हुनलाई दारी पाल्नै पर्छ भन्ने वाध्यताकारी भने छैन ।