काठमाडौं (हाम्रो खेलकुद)- काभा महिला भलिबल नेसन्स लिगको उपाधि जितेको भारतका खेलाडी व्यक्तिगत अवार्डमा पनि वर्चस्व कायम गरेका छन् ।

भारतले व्यक्तिगत ८ मध्ये ४ विधामा अवार्ड हात पार्यो।
प्रतियोगिताको मोस्ट भ्यालुएबल प्लेयर भारतकी सालिनी सर्भानन बनिन्।

उपाधि विजेता भारतको यात्रामा सालिनीको योगदान महत्वपुर्ण रहेको थियो। उनले बेस्ट आउटसाइड हिटर २ को अवार्ड पनि जितिन्। उनी व्यक्तिगततर्फ दुई अवार्डको हकदार बनिन्।

भारतककी सूरिया थोतन्गल बेस्ट मिडल ब्लकर १ को अवार्ड जित्न सफल भइन्। भारतकी जुही शाले बेस्ट सेटरको उपाधि जितिन्।

रजत पदक विजेता नेपालले २ व्यक्तिगत अवार्ड प्राप्त गर्यो। सलिना श्रेष्ठले बेस्ट लिबेेरो र सरस्वती चौधरीले बेस्ट अपोजिट प्लेयरको अवार्ड हात पारिन्‌ ।

प्रतियोगितामा तेस्रो भएको युवा टोली इरानले पनि २ व्यक्तिगत अवार्ड आफनो नाममा लेखायो। इरानकी मसोमेह घदामी बेस्ट आउटसाइड हिटर १ को अवार्ड जित्न सफल रहिन्। यस्तै मोबिना घराफानलाई बेस्ट मिडल ब्लकर २ को अवार्ड प्रदान गरियो।

५ राष्ट्र सम्मिलित प्रतियोगितामा पहिलो, दोस्रो र तेस्रो हुने राष्ट्रले व्यक्तिगततर्फको अवार्ड प्राप्त गरे। श्रीलंका र माल्दिभ्सका खेलाडीले कुनै पनि व्यक्तिगत अवार्ड जित्न सकेनन्।

त्रिपुरेश्वरस्थित राष्ट्रिय खेलकुद परिषद्को‌ कभर्ड हलमा बुधवार भएको फाइनलमा नेपाललाई ३-२ ले हराउँदै भारत काभा नेसन्स लिगमा च्याम्पियन बनेको हो । श्रीलंकालाई‌ हराउँदै इरान प्रतियोगितामा तेस्रो भयो ।