काभा बिच भलिबल – कमला र मनिषाको जोडी फाइनलमा

काठमाडौं (हाम्रो खेलकुद) – नेपालको महिला राष्ट्रिय बिच भलिबल टोली भुटानमा जारी काभा बिच भलिबल च्याम्पियनसिपको फाइनलमा पुगेको छ।

कमला पुन र मनिषा चौधरीको नेपाली जोडीले
भुटानको राजधानी थिम्पुस्थित चाङ्लिमिथाङ राष्ट्रिय रंगशालामा उज्वेकिस्तानको‌ जोडीलाई शनिबार २-० को‌ सोझो सेटमा पराजित गर्दै उपाधि नजिक पुगेको हो ।
प्रशिक्षक रुपेश विष्टका अनुसार नेपाली जोडीले २१-१३, २१-१२ ले हराएको थियो।

नेपाली महिला जोडी अपराजित रहँदै सेमिफाइनल पुगेको थियो। पहिलो दिन एक खेल जितेको कमला र मनिषा जोडीले दोस्रो दिन शुक्रबार थप २ जित निकाल्दै अन्तिम चारमा स्थान पक्का गरेको हो ।

पुरुषतर्फ पहिलो दिन पराजित मान बहादुर श्रेष्ठ र दिल बहादुर सुनारको जोडीले दोस्रो दिन लगातार तीन जित निकाल्दै अन्तिम चारको स्थान तय गरेको थियो ।