काठमाडौं (हाम्रो खेलकुद)- दाबेदार भारतले काभा महिला भलिबल नेसन्स लिगमा पहिलो जित हात पारेको छ।

इरानलाई तीन एकले हराउँदै भारतले विजयी सुरूवात गरेको हो। भारतले २५-२०, २५-१८, १९-२५ र २५-११ ले खेल आफ्नो पक्षमा पारेको हो।

त्रिपुरेश्वरस्थित राष्ट्रिय खेलकुद परिषदको‌ कभर्ड हलमा आज भएको दोस्रो खेलमा भारतलाई इरानले चुनौती दिए पनि अप्रत्याशित नतिजा निकाल्न सकेन।

पहिलो सेट प्रतिस्पर्धामक बन्यो। जहाँ भारतले २५-२० ले पहिलो सेट जित्दै एक शुन्यको अग्रता बनायो। दोस्रो सेटमा भने भारतले सहजै २५-१८ ले जित्यो।

दुई शुन्यले पछि परेको युवा टोली इरानले भारतलाई दबाबमा राख्न सफल रहयो। २५-१९ ले इरानले तेस्रो सेट जित्दै खेललाई दुई एकमा पुर्याउँदै खेलमा फर्कने संकेत देखायो।

तर यो लयलाई इरानले चौथो सेटमा निरन्तरता दिन सकेन। यो सेटमा भारत हाबी रहयो र चौथो सेट २५-११ ले जित्दै तीन एकले खेल आफ्नो पक्षमा पार्यो।

प्रतियोगिताको उद्घाटनमा नेपालले श्रीलंकालाई ३-० को‌ सोझो सेटमा हराएको थियो।

प्रतियोगितामा नेपाल सहित भारत, श्रीलंका, माल्दिभ्स र इरानको सहभागीता रहेको छ। प्रतियोगिता अन्तर्गत भोलि दुई खेल हुनेछन्।

पहिलो खेलमा इरान र श्रीलंकाबीच प्रतिस्पर्धा हुनेछ। दोस्रो खेलमा माल्दिभ्सले भारतको सामना गर्नेछ। अब नेपालले दोस्रो खेल भारतसँग शनिबार खेल्नेछ।