काभा यु २० भलिबल सेमिफाइनल – नेपालको किर्गिजस्तान सामना गर्दै

काठमाडौं (हाम्रो खेलकुद) – नेपाली महिला युवा टोलीले माल्दिभ्समा जारी काभा यु २० महिला भलिबल च्याम्पियनसिप फाइनल प्रवेशका लागि आज किर्गिजस्तानको सामना गर्दैछ। खेल‌ नेपाली समय अनुसार राती ९:१५ बजे सुरु हुनेछ।

लिग चरणको अंक तालिकाको पहिलो र चौथो तथा दोस्रो र तेस्रो टोलीले सेमिफाइनलमा प्रतिस्पर्धा गर्ने खेल तालिका अनुसार नेपाल किर्गिजस्तानको भेट पक्का भएको हो ।

पहिलो सेमिफाइनलमा शीर्ष स्थानको‌ श्रीलंका र पुछारको आयोजक माल्दिभ्सबीच हुनेछ।
शनिबार माल्दिभ्सलाई ३-० ले पराजित गर्दै नेपालले तेस्रो स्थान सुरक्षित गरेको थियो।

लिगको अन्तिम खेलमा किर्गिजस्तानलाई ३-२ ले हराउँदै श्रीलंकाले ८ अंकसहित शीर्ष स्थान पक्का गरेको थियो। ७ अंकका साथ किर्गिजस्तान दोस्रो, तेस्रो भएको नेपालको ३ अंक र माल्दिभ्स अंक विहिन रह्यो।

लिग चरणमा नेपालले किर्गिजस्तानलाई सुरुवाती दुई सेटमा कडा टक्कर दिएपनि ३-० को‌ सोझो सेटको हार बेहोरेको थियो। खेलमा किर्गिजस्तान २७-२५, २५-२३,२५-१७ ले विजयी भएको थियो।