सुमन अधिकारी,बुटवल
‘साइकल चलाऔ, स्वस्थ्य र पर्यावरण जोगाऔ’ भन्ने मुल नारासहित बुटवल साइकल ग्रुपको आयोजनामा बुटवलमा बुटवल कोरा –२०२४ हुने भएको छ ।

बुटवल युनाईटेड साइक्लिङ क्लब, साईकल सिटी बुटवल, ह्याप्पी साईक्लिङ क्लब, तिनाउ साईक्लिङ क्लबको सहकार्य साउन ५ गते आयोजना हुन लागेको ‘बुटवल कोरा २०२४, माई कोरा च्यालेन्ज’ कार्यक्रममा २ सयभन्दा बढी साइकल यात्रीहरुको सहभागिता रहने जनाइएको छ ।

बुटवलमा बुधबार पत्रकार सम्मेलन गरि कार्यक्रमको तयारी पूरा भएको बुटवल साईक्लिङ क्लबका अध्यक्ष शिव चौधरीले बताएका छन् ।

कोराका क्रममा साइक्लिङ खेलकुदको विकासको सन्देशसहित रुपन्देहीका ३ पालिकाहरुका महत्वपूर्ण धार्मिक पर्यटकिय स्थल परिक्रमा गर्ने कार्यक्रम रहेको लुम्बिनी प्रदेश साइक्लिङ संघका अध्यक्ष स्वस्तिक श्रेष्ठले बताएका छन् । कार्यक्रममा विभिन्न साइकल इभेन्ट समेत आयोजना हुने उनले बताए ।

संघका अध्यक्ष श्रेष्ठले जुलाई २० तारिकका दिन विश्वभर नै यो महत्वपूर्ण साईकल र्याली पर्वको रुपमा मनाइदै आएको भन्दै साईकल साहसिक खेलका रुपमा रहेकाले युवा खेलाडी उत्पादनमा जोड दिएका बताएका छन् ।

साइक्लिङ मणिमुकुन्द कलेजबाट सुरु भएर श्रृगेश्वरधाम, मणिग्राम, गोलपार्क, ट्राफिक चोक, कालिकापथ हुँदै पुनः मणिमुकुन्द कलेज परिसर‌ पुगेर टुंगिने बताइएको छ।