काठमाडौं (हाम्रो खेलकुद) – फिजियोथेरापी रिह्याबिलिटेशन सेन्टर एसोसिएसन नेपालले (प्राण) पुनर्स्थापना व्यवसायीका लागि टेबलटेनिस प्रतियोगिताको सम्पन्न गरेको छ ।

एसोसिएसनले एभिएम स्कूल, ललितपुरमा देशभरका पुनर्स्थापना व्यवसायीहरूलाई एक दिनको उत्साहजनक प्रतिस्पर्धा र सौहार्दताको लागि एकै ठाउँमा ल्याउँदै टेबल टेनिस प्रतियोगिता सफलतापूर्वक आयोजना गरेको हो ।

कार्यक्रममा पुरुष र महिला एकल विधामा कुल ५२ जना सहभागी थिए । नकआउट आधारमा आयोजना गरिएको प्रतियोगितामा पिएमआर डाक्टर, फिजियोथेरापिस्ट, स्पीच थेरापिस्ट, अडियोलोजिष्ट, अकुपेसनल थेरापिस्ट, साईकोलोजिस्ट, बिहेवियरल थेरापिस्ट, भिजन थेरापिस्ट, र रिह्याबिलिटेसन नर्सहरू सहित विभिन्न पुनर्स्थापना विशेषज्ञहरूको उत्साहजनक सहभागिता रहेको थियो ।

महिला एकलतर्फ वीर अस्पतालकी फिजियोथेरापी इन्टर्नकी रितु अवाल विजयी भइन् भने फिजियो प्रभा अधिकारी उपविजेता बनिन् । पुरुष एकलतर्फ धुलिखेल अस्पतालका फिजियो निश्चल श्रेष्ठ शीर्षस्थानमा रहे भने स्पाइनल इन्जुरी सेन्टरका अजय विक उपविजेता बने ।

कार्यक्रमले नेपालमा पुनर्स्थापना व्यवसायीहरूका बीचमा सामुदायिक भावनालाई बढावा दिन र शारीरिक तन्दुरुस्ती प्रवर्द्धन गर्न महत्त्वपूर्ण कोसेढुङ्गाको रूपमा चिन्ह लगाउने आशा आयोजकले राखेको छ ।