काठमाडौं (हाम्रो खेलकुद) – न्यु डायमण्ड महिला भिलबल टिमले आफ्नो स्थापना दिवसको अवसरमा यु १८ महिला भलिबल प्रतियोगिताको आयोजना गरेको थियो ।

न्यु डायमण्डको स्थापना दिवस जेठ ५ गते सुरु भएको प्रतियोगिता मंगलबार सम्पन्न भएको थियो । भलिबल दिवस (जेठ ८ गते) को अवसरमा भएको फाइनलमा चन्द्रागिरी नगरपालिका न्यु डायमण्डले उपाधि जितेको छ ।

चन्द्रागिरीले फाइनलमा न्यु डायमण्ड एकेडेमीलाई ३–१ को सेटमा पराजित गरेको हो । पहिलो सेट २०–२५ ले गुमाएको चन्द्रागिरी न्यु डायमण्डले त्यसपछिका तीन सेटमा लगातार जित हात पारेको थियो । चन्द्रागिरीले न्यु डायमण्ड एकेडेमीलाई २५–२१, २५–१५ र २५–१३ ले पराजित गर्दै उपाधि जितेको हो ।

तेस्रो स्थानका लागि आजै भएको खेलमा ज्ञान सुधा एकेडेमीले श्री कृष्ण माविलाई ३–० को सोझो सेटमा हराएको थियो । ज्ञान सुधाले श्री कृष्ण माविमाथि २५–६, २५–१९ र २५–११ को जित निकालेको थियो ।

चन्द्रागिरीकी सलिना बुढामगर प्रतियोगिताकै सर्वोत्कृष्ट खेलाडी बनिन् । त्यस्तै न्यु डायमण्डकी जुनिसा विश्वकर्माा उत्कृष्ट स्पाइकर, ज्ञानसुधाकी ज्यास्मिन रुम्बा उत्कृष्ट सर्भर, चन्द्रागिरीकी रञ्जना बुढा मगर उत्ृकष्ट ब्लकर, नम्सार रानामगर उत्कृष्ट सेटर, एञ्जिला प्रधान उत्कृष्ट डिफेन्डर चुनिए । चन्द्रागिरी ललिता नाथ उत्कृष्ट प्रशिक्षक चुनिइन् ।

यसैबीच, भलिबल दिवस मनाउने क्रममा एपिएफ भलिबल क्लब र न्यु डायमण्डबीच मैत्रीपूर्ण खल भएको थियो । न्यु डायमण्डको पुरानो नैकापस्थित भलिबल कोर्टमा भएको खेलमा एपीएफले न्यु डायमण्डलाई २५–१७ र २५–२२ ले पराजित गर्यो ।