काठमाडौं (हाम्रो खेलकुद) – नेपाल मलेसियाको क्वालालम्पुरमा जारी सेपाकताक्रो विश्व कपको रेगु र डबल इभेन्टको दुवैमा तेस्रो भएको छ ।

विश्व कपमा मंगलबार भएको सेमिफाइनलमा नेपाल रेगु इभेन्टमा चाइनिज ताइपेइसँग २–१ सेटमा हराएको थियो । चाइनिज ताइपेसँग नेपाली टोली ११–१५,१५–१०,१२–१५ ले पराजित गर्यो । रेगुको अर्को सेमिफाइनलमा इरानसँग २–० ले पराजित भएको बंगलादेश पनि नेपालसँग संयुक्त रुपमा तेस्रो भएको छ ।

डबल इभेन्टमा नेपाल इरानसँग २–० सेटले पराजित भएको हो । इरानसँगको खेल नेपालले १३ –१५ ,११ –१५ ले गुमाएको थियो ।
त्यस्तै डबल इभेन्टमा चाइनिज ताइपेइसँग २–१ सेटले पराजित हुँदै जर्मनी नेपालसँगै तेस्रो भएको छ । रेगु र डबल दुवै इभेन्टको फाइनल इरान र चाइतिज ताइपेइबीच हुनेछ ।

रोशन तामाङको कप्तानीमा रहेको नेपाली टोलीमा दीपेश जङ्ग थापा, उमेश बहादुर महतो, अनिल जार्गा मगर, विजय महतो र पदम बहादुर थाडा मगर छन् ।

प्रशिक्षकमा श्याम बहादुर श्रेष्ठ, म्यानेजरमा नेत्र प्रसाद गुरुङ्ग र अन्तराष्ट्रिय टेक्निकल अफिसरमा नेसिर मास्के छन् । २१ राष्ट्रको सहभागिता रहेको प्रतियोगितामा नेपालसहित ९ राष्ट्र डिभिजन वान र प्रिमियरमा १२ राष्ट्र छन् ।