पोखरा (हाम्रो खेलकुद)– गत वर्ष भएको चौथो टाइगर कप आमन्त्रित क्लब भलिबल च्याम्पियनसिपबाट १८ लाख रुपैयाँ भन्दा बढी बचत भएको छ ।

आयोजक टाइगर ग्रुप अफ पोखरा नेपालले सोमबार पत्रकार सम्मेलन गर्दै प्रतियोगिताको आय–व्यय सार्वजनिक गर्दै १८ लाख ३७ हजार ४ सय ६४ रुपैयाँ बचत भएको जानकारी दिएको हो ।

गत माघ १ देखि ७ गते सम्म आयोजना भएको प्रतियोगिताबाट १ करोड २१ लाख ८८ हजार ८ सय ६१ रुपैयाँ आम्दानी भएको बताइएको छ । त्यस्तै प्रतियोगितामा १ करोड ३ लाख ५१ हजार ३ सय ९७ रुपैयाँ खर्च बताएको बताइएको छ । टाइगर ग्रुपका अध्यक्ष नारायण प्रसाद शर्माले प्रतियोगितामा यसपटक विगतमा भन्दा तेब्बर बढी आम्दानी भएको बताएका छन् ।

प्रतियोगितामा टिकट विक्रीबाट मात्र २२ लाख २२ हजार २ सय २२ रुपैयाँ आम्दानी भएको बताइएको छ । स्वदेश तथा विदेश एवं संघ संस्थाबाट ५४ लाख १४ हजार १ सय ३९ रुपैयाँ, मुख्य प्रायोजकबाट १५ लाख रुपैयाँ, राष्ट्रिय खेलकुद परिषदबाट ४ लाख ९२ हजार ५ सय रुपैयाँ सहयोग भएको बताइएको छ ।

त्यस्तै प्रदेश खेलकुद परिषद गण्डकीबाट ५ लाख ७५ हजार, पोखरा महानगर पालिकाले ९ लाख ८५ हजार र मुख्यमन्त्रीको कार्यालय गण्डकी प्रदेशले १० लाख रुपैयाँ सहयोग गरेको आयोजक जानकारी दिएको छ । अध्यक्ष शर्माले बचत भएको रकम सामजिक विकास एवं खेलकुद क्षेत्रको विकासका लागि सहयोग गर्ने प्रतिवद्धता जनाएका छन् । उनले सहयोगी सबैलाई धन्यवाद दिए ।

चौथो टाइगर कपमा महिला र पुरुष गरी १२ टोलीको सहभागिता थियो । महिलातर्फ एक भारतीय र पुरुषतर्फ एक श्रीलंकन आर्मी टोलीको सहभागिता थियो । टिपटप हेल्प नेपालले पुरुष र एएिएफ क्लबले महिलातर्फको उपाधि जितेको थियो ।