काठमाडौं (हाम्रो खेलकुद) – हेटौडा उप महागनरपालिकाले पहिलो बागमती अन्तरपालिका स्तरिय राष्ट्रिय भलिबल प्रतियोगिताको उपाधि जितेको छ ।

प्रकाश दाहालको स्मृतिमा प्रज्ञा स्मृतिको आयोजना भएका प्रतियोगिताको बुधबार भएको फाइनल थाहा नगरपालिकाविरुद्ध उत्कृष्ट पुनरागमन गर्दै हेटौडाले उपाधि जितेको हो । सुरुवाती दुई सेट गुमाएको हेटौडाले २१–२५, १७–२५, २५–१६, २५–१५ र १५–४ ले जितेको थियो ।

प्रतियोगितामा महांकाल गाउँपालिका र घ्याकलेक गाउँपालिका तेस्रो भए । विजेताले ३ लाख, उपविजेताले २ लाख तथा तेस्रो हुने दुवै टोलीले समान १ लाख रुपैयाँ पुरस्कार प्राप्त गरे ।

कार्यक्रम संयोजक एवं महाङ्काल गाउँपालिका उपाध्यक्ष डोल्मामाया गोलेको अनुसार थाहा नगरपालिकाका विष्णु क्षेत्री उत्कृष्ट खेलाडी घोषित भए । हेटौंडाका सुजन चोखालले उत्कृष्ट सेटर, हेटौंडाका राजन दर्लामी मगर उत्कृष्ट लिबेरो घोषित भए ।

महांकाल गाउँपालिकाका जीवन सुनार उत्कृष्ट ब्लकर भए र हेटौंडाका पुष्प मैनाली उत्कृष्ट प्रशिक्षक घोषित भए । विधागत उत्कृष्ट हुनेले समान ५० हजार रुपैयाँ पुरस्कार प्राप्त गरे ।

प्रधानमन्त्री पुष्पकमल दाहाल प्रचण्डका छोरी ज्ञानी दाहाल र छोरा प्रकाश दाहालको स्मृतिमा स्थापित प्रज्ञा स्मृति प्रतिष्ठानको आयोजनामा प्रतियोगिता सञ्चालन भएको हो ।

प्रतियोगितामा राष्ट्रिय खेलकुद परिषद् र प्रदेश खेलकुद विकास परिषद्, बागमती प्रदेशको सहयोग थियो । यसैगरी नेपाल भलिबल संघको प्राविधिक सहयोग थियो । ललितपुर जिल्ला खेलकुद विकास समिति प्रतियोगिताको सह आयोजक रहेको थियो ।