काठमाडौं (हाम्रो खेलकुद)- सहाना प्रधान प्रतिष्ठानको‌ आयोजनामा असारमा प्रथम सहाना प्रधान यु-१९ महिला तथा पुरुष भलिबल च्याम्पियनसिप हुने भएको छ।

नेपाल भलिबल संघको प्राविधिक र व्यवस्थापनमा‌ असार ९ गतेदेखि १५ गतेसम्म च्याम्पिनसिप हुने बुधबार पत्रकार सम्मेलनमा जानकारी गराइयो। प्रतियोगितामा ७ प्रदेशका महिला र पुरुषबीच सहभागिता रहने बताइएको छ।

भलिबल संघका‌ अध्यक्ष जीतेन्द्रबहादुर चन्दले प्रदेशलाई खेलाडी छनोटका‌ लागि समय मिलोस् भन्नका लागि छिट्टै च्याम्पिनसिप आयोजनाको घोषणा गरिएको‌ छ।

दुवैतर्फको‌ विजेताले ३ लाख, दोस्रोले २ लाख र तेस्रोले १ लाख रुपैयाँ प्राप्त गर्नेछ। प्रतियोगिताको दुवैतर्फका सर्वोत्कृष्ट खेलाडीले २५ हजार र व्यक्तिगत विधातर्फ १० हजार रुपैयाँ प्राप्त गर्ने छन् ।

प्रतियोगिताबाट यु १९ राष्ट्रिय टोलीका लागि खेलाडी छनोट गरिने भलिबल संघका अध्यक्ष चन्दले जानकारी दिए।

कार्यक्रममा प्रतिष्ठानकी अध्यक्ष तथा पूर्वमन्त्री रामकुमारी झाँक्री र भलिबल संघका अध्यक्ष चन्दले सम्झौता पत्रमा हस्ताक्षर गरे। ८० लाख रुपैयाँ खर्च हुने अनुमान गरिएको प्रतियोगिताको आर्थिक व्यवस्थापन प्रतिष्ठान र बाँकी जिम्मेवारी संघले निर्वाह गर्ने बताइएको छ।

नेपाली राजनीतिको उदाहरणीय व्यक्तित्वको नाममा प्रतियोगिता आयोजना गर्ने पाउनु गर्वको बिषय भएको र यो प्रतियोगितामा युवा भलिबल खेलाडीलाई प्रतिभा प्रदर्शनको कोसेढुंगा सावित हुने विश्वास लिइएको बताइन् ।