धुलिखेल (हाम्रो खेलकुद) – छैटौं साहना प्रधान स्मृति राष्ट्रिय महिला हक्की प्रतियोगिताको सेमिफाइनल समीकरण पूरा भएको छ ।

आइतबार भएको खेलमा आर्मी समूह ए को विजेता बन्दै सेमिफाइनलमा प्रवेश गरेको हो। आर्मीले अब सेमिफाइनलमा मधेश प्रदेशको सामना गर्ने छ । त्यस्तै समूह बी को विजेता बनेको सुदूरपश्चिम प्रदेशले गण्डकी प्रदेशसँग सेमिफाइनलमा प्रतिस्पर्धा गर्नेछ ।

आइतबार पहिलो खेलमा सुदूरपश्चिम प्रदेश र मधेसले १–१ गोलको बराबरी खेले । खेलको १४औं मिनेटमा सन्जु चौधरीले गोल गर्दै सुदूरपश्चिमलाई अग्रता दिलाइन । तर टोलीले अग्रता जोगाउन सकेन । खेलको ३४औं मिनेटमा भूमिका कुमारीले मधेसका लागि बराबरी गोल गरिन् ।

दोस्रो खेलमा गण्डकीले ज्योति काफ्ले ह्याट्रिकसहित बागमती प्रदेशलाई ६–० गोलले हराएको छ । गण्डकी लागि खेलको छैटौं मिनेटमा सीतामाया बल, ३६औं मिनेटमा गिता पुन मगरले, ३७औं मिनेटमा सीता माया पुनले गोल गरिन् । ज्योतिले ४५औं, ५३औं र ५४औं मिनेटमा ह्याट्रिक पूरा गरिन् ।

तेस्रो खेलमा सुदूरपश्चिमले लुम्बिनीलाई ८–० गोलले हरायो । सुदूरपश्चिमका लागि खेलको सन्जु चौधरी ह्याट्रिक पूरा गर्दा नमिता एसके र अनु गिरिले समान २ गोल र पुर्णिमा उराले १ गोल गरिन् ।

अर्को खेलमा आर्मी क्लबले बागमतीलाई ९–० गोल अन्तरले हरायो। आर्मीका लागि सरस्वती तामाङले ४, सिमा खड्काले २ तथा डम्मरा भट्ट र सुनिता नेगिले समान १ गोल गरिन् ।

प्रतियोगितामा दुवै सेमिफाइनल सोमबार हुनेछ । प्रतियोगितामा ५ प्रदेश र आर्मी गरि ६ टोलीको सहभागिता रहेको छ । विजेताले १ लाख, दोस्रोले ७५ हजार र तेस्रो टोललीे ५० हजार रुपैयाँ प्राप्त गर्नेछन् ।