धुलिखेल (हाम्रो खेलकुद) – त्रिभुवन आर्मी क्लबले छैटौं साहना प्रधान स्मृति राष्ट्रिय महिला हक्की प्रतियोगितामा विजयी सुरुवात गरेको छ । दोस्रो खेलमा लुम्बिनी प्रदेशले अग्रता जोगाउन नसक्दा मधेस प्रदेशसँग १–१ गोलको बराबरी खेलेको छ ।

शनिबार भएको उद्घाटन खेलमा आर्मीले गण्डकी प्रदेशलाई ३–० गोल अन्तरले हराएको हो । धुलिखेल खेल मैदानमा भएको खेलमा आर्मीलाई जित दिलाउन सिमा खड्का, डम्मरा भट्ट र सरस्वती तामाङले समान १ गोल गरिन् ।

२१औं मिनेटमा सिमाले गोल गर्दै टोलीलाई अग्रता दिलाइन । डम्मराले खेलको ५० औं मिनेटमा गोल गरिन् । सरस्वतीले खेलको ५६औं मिनेटमा गोल गरेपछि टोलीको जित सहज बन्यो । आर्मीले ३ अंक जोडेको छ ।

दोस्रो खेलमा लुम्बिनीले सातौं मिनेटमा अनन्य बड्नवालको गोलबाट अग्रता लिएको थियो । मधेशले ४०औं मिनेटमा बरारी गोल फर्कायो ।

प्रतियोगितामा आइतबार ४ खेल हुनेछन् । आर्मी र बागमती प्रदेशबीच पहिलो र अर्को खेलमा सुदूरपश्चिम प्रदेशले मधेसको सामना गर्नेछ । तेस्रो खेलमा गण्डकी र बागमती तथा अन्तिम खेल लुम्बिनी र सुदूरपश्चिमबीच प्रतिस्पर्धा हुनेछ ।

प्रतियोगितामा आर्मी, बागमती, गण्डकी, लुम्बिनी , मधेश र सुदूरपश्चिम प्रदेश गरि ६ टोलीको सहभागिता छ । सहभागी टोलीलाई २ समूहमा विभाजन गरी लिग कम नकआउट आधारमा खेल खेलाइएको छ । प्रतियोगिताको विजेताले १ लाख, दोस्रोले ७५ हजार र तेस्रो हुनेले ५० हजार रुपैयाँ प्राप्त गर्नेछ ।