काठमाडौं (हाम्रो खेलकुद) – साविक विजेता प्रदीप खड्का र अभिलाषा विष्टले १० औं सिटिजन्स बैंक खुला टेनिस प्रतियोगिताको सिंगल्सतर्फको‌ उपाधि रक्षा गरेका छन् ।

त्रिपुरेश्वरस्थित राष्ट्रिय खेलकुद परिषद्को टेनिस कोर्टमा शनिबार भएको पुरूष सिंगल्समा राष्ट्रिय च्याम्पियन प्रदीपले उपाधि रक्षा गर्ने क्रममा प्रणव मानन्धरलाई सोझो सेटमा सहजै हराए । उनले ६–३ र ६–२ ले खेल आफ्नो पक्षमा पार्दै उपाधि आफ्नो नाममा लेखाए।

महिला सिंग्ल्सको फाइनल पनि एकपक्षीय बन्यो। अभिलाषाले सुनिरा थापालाई ६–० र ६–१ अत्यन्त सहज नतिजामा पराजित गरिन् । सिंगल्स पुरूष र महिला दुवैतर्फको विजेताले जनही ५० हजार र दोस्राले २५ हजार रुपैयाँ प्राप्त गरे ।

प्रतियोगिताको भेट्रानमा पूर्व राष्ट्रिय च्याम्पियन जितेन्द्र परियारले दोहोरो स्वर्ण जिते। उनी ३५ वर्षमाथि पुरुष सिंगल्स र डबल्समा पहिलो भए । विमलकुमार गुरुङले पनि दुई स्पर्धामा स्वर्ण जिते । उनले ले ५५ वर्षमाथि सिंगल्स र डबल्समा स्वर्ण हात पारे ।

प्रतियोगिताको भेट्रान ६५ वर्षमाथि पुरुष सिंगल्समा कमल थापा तथा डबल्समा विदुर विष्ट र धीरबहादुर गुरुङको जोडी पहिलो भयो ।

सिटिजन्स बैंकको प्रमुख प्रायोजनमा काठमाडौं जिल्ला टेनिस संघले आयोजना गरेको प्रतियोगितामा ११ स्पर्धामा प्रतिस्पर्धा भएको थियो । कुल ५ लाख ८२ हजार ५ सय रुपैयाँ पुरस्कार रहेको प्रतियोगितामा १ सय ५१ खेलाडीले प्रतिस्पर्धा गरेका थिए।