काठमाडौं (हाम्रो खेलकुद) – सातौं केएनपी नेरोलेक महिला भलिबल प्रतियोगिताको दोस्रो दिन बुधबार पनि दुई खेल हुँदैछन् ।
त्रिपुरेश्वरस्थित राष्ट्रिय खेलकुद परिषद्को कभर्ड हलमा दिउँसो १ः०० बजे सुरु हुने खेलमा दुई विभागिय टोली साविक उपविजेता नेपाल एपिएफ क्लब र त्रिभुवन आर्मी क्लबबीच हुनेछ ।

एपिएफल लगातार दोस्रो खेल जित्ने योजनामा हुनेछ भने आर्मी फाइनल प्रवेशको सम्भावनालाई जीवित पार्ने प्रयासमा हुनेछ । आर्मी पहिलो खेलमा चन्द्रागिरी नगरपालिका न्यु डायमण्ड महिला टिमसँग ३–१ ले पराजित भएको थियो । एपिएफले भने अर्को विभागिय टोलीलाई नेपाल पुलिस क्लबले ३–१ ले नै हराएको थियो ।

दिउँसो ३ः०० बजे साविक विजेता न्यु डायमण्डले पुलिसको सामना गर्नेछ । डायमण्डले लगातार दोस्रो जित्ने प्रयासमा हुनेछ । पुलिसले भने जितको खाता खोल्न प्रयास गर्नेछ । सहभागी ४ टोलीले एकअर्कासँग खेलेपछि शीर्ष २ टोलीले फाइनल र पुछारका २ टोलीले तेस्रो स्थानका लागि खेल्नेछन् ।

शेरबहादुर खड्का स्मृति प्रतिष्ठानको आयोजनामा जारी प्रतियोगिताको विजेता टोलीले ४ लाख ९९ हजार रुपैयाँ प्राप्त गर्नेछ। दोस्रो टोलीले २ लाख ५० हजार, तेस्रोले १ लाख २५ हजार र चौथो टोलीले ६२ हजार रुपैयाँ प्राप्त गर्नेछ ।

प्रतियोगिताको सर्वोत्कृष्ट खेलाडीले ५० हजार रुपैयाँ प्राप्त गर्नेछिन् । विधागततर्फ उत्कृष्ट हुनेलाई २५ हजार र हरेक खेलको प्लेयर अफ दि म्याचले १५ हजार रुपैयाँ प्राप्त गर्नेछन् ।