राखेपले यसै साता ६० औं वार्षिकोत्सव मनाउने

काठमाडौं (हाम्रो खेलकुद) – राष्ट्रिय खेलकुद परिषद् (राखेप) ले यहि साता आफ्नो ६० औं वार्षिकोत्सवमा विभिन्न कार्यक्रम गर्ने भएको छ ।

राखेपका संरक्षक समेत रहेका प्रधानमन्त्री पुष्पकमल दाहाल ‘प्रचण्ड’ को प्रमुख आतिथ्यतामा कार्यक्रम बुधबार हुने राखेपले जनाएको छ । राखेपले विविध कार्यक्रमसहित भृकुटीमण्डपस्थित राष्ट्रिय सभागृहमा वार्षिकोत्सव मनाउने तयारी भइरहेको जनाएको छ ।

कार्यक्रममा विभिन्न ६ विधामा १८ अवार्ड प्रदान गरिने छ । सिनियर/जुनियर समान २–२ गरी ४ खेलाडी, ८ कर्मचारी (२ करार कर्मचारीसहित), १ पारा खेलाडी र २ खेल पत्रकारलाई अवार्डसहित नगदबाट पुरस्कृत गरिने बताइएको छ ।

त्यस्तै खेल क्षेत्रमा उत्कृष्ट कार्य गरेवापत समान १–१ स्थानिय तह, प्रायोजक र राष्ट्रिय खेल संघलाई सोही अवसरमा सम्मान गरिने जनाएको छ ।

सदस्य–सचिव टंकलाल घिसिङ राखेपको नेतृत्वमा आएदेखि वार्षिकोत्सवमा थप नयाँ विधाको अवार्ड थप गरिएको थियो । खेलाडी अवार्ड, करार कर्मचारी अवार्ड र स्थानिय तह अवार्ड ५९ औं संस्करणदेखि थपिएको हो ।

दिउँसो ३ः३० बजे सुरु हुने कार्यक्रममा कलाकार हरिवंश आचार्य, गायक राजेशपायल राई र नृत्यकार सरोज प्रजा र विना रावतको प्रस्तुती रहने बताइएको छ ।