काठमाडौं (हाम्रो खेलकुद) – व्यवसाय सुरु भएको १० औं वार्षिकोत्सवका अवसरमा स्पोर्टस युनिर्भसले खेलाडीहरुका लागि सामान खरिदमा २० प्रतिशत छुट दिने भएको छ ।

राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ र स्पोर्टस युनिभर्सका निर्देशक किशोरकुमार जोशीले बिहीबार एक वर्षे सम्झौता पत्रमा हस्ताक्षर गरेका छन् । सम्झौता २०८१ वैशाख १ गतेबाट सुरु हुने बताइएको छ ।

राष्ट्रिय, अन्तर्राष्ट्रिय, प्रदेश र जिल्लास्तरीय खेलाडीलाई स्पोर्टस युनिर्भसले आफ्ना खेल सामाग्री र पोशाकमा २० प्रतिशतको छुट दिने निर्देशक जोशीले बताए । त्यसका लागि खेलाडीले आफ्नो प्रमाणसहित एउटा फारम भरेर छुटको कार्ड लिन सक्ने बताइएको छ ।

बानेश्वरबाट शंखमुल जाने रोडमा रहेको स्पोर्टस युनिभर्समा फुटबल, क्रिकेट, भलिबल, ब्याडटिमन्टन, टेबल टेनिस, मार्सल आर्टसलगायत अधिकांश खेलका सामग्री र पोशाक विक्रीका लागि राखिएको जोशीले जानकारी दिए ।

खेलाडी संघका अध्यक्ष श्रेष्ठले यो सम्झौताले खेलाडीहरुलाई सहयोग पुग्ने विश्वास लिएको बताएका छन् । खेलाडी संघले सोमबार आयोजना गर्ने १८ औं एनएनआइपिए स्पोर्टस अवार्डका सर्वोत्कृष्ट खेलाडी, प्रतिभावान खेलाडी, गजराज जोशी आदर्श खेल व्यक्तित्व, उत्कृष्ट पारा खेलाडी र एनएनआइपिए खेलकुद पत्रकारलाई स्पोर्टस युनिभर्सले गिफ्ट ह्याम्पर प्रदान गर्ने बताइएको छ ।