काठमाडौं (हाम्रो खेलकुद)- नेपाल ट्रायथलन संघले आइतबार गण्डकी प्रदेश ट्रायथलन संघ र कास्की जिल्ला ट्रायथलन संघसँगको सहकार्यमा ‘ट्रायथलन फेमिलियराइजेसन’ कार्यक्रमको आयेजना गरेको छ ।

ट्रायथलन संघका अध्यक्ष निलेन्द्रराज श्रेष्ठले पोखरामा वैशाख महिना हुने एसिया ट्रायथलन कप र दक्षिण एसिया ट्रायथलन च्याम्पियन्सिप सफल बनाउने सो क्षेत्रका सरोकारवालाहरुसँग छलफल गरेका हुन् ।

उनले ट्रायथलनका लागि  उपयुक्त पोखरामा यस खेलको अपनत्व दिनका लागि यो कार्यक्रमको आयोजना गरेको उल्लेख गर्दै खेलको इतिहासबारे पनि जानकारी दिए। 
एसिया ट्रायथलन कप र दक्षिण एसिया ट्रायथलन च्याम्पियन्सिप २०८१ वैशाख १५ र १६ गते हुने बताइएको छ।

यसअघि वैशाख ८ र ९ गते पोखराकै स्थनीयहरुलाई लक्षित गरेर टेक्सिनकल अफिसर्स कोर्सको आयोजना गरेर २५ जनालाई प्रशिक्षण दिने निर्णय भएको संघले जानकारी दिएको‌ छ ।

ट्रायथलन संघले गण्डकी प्रदेशलाई स्थानिय आयोजक कमिटीको जिम्मेवारी दिएको छ । गण्डकी प्रदेशका अध्यक्ष डिल्लीराज सुवेदीले अबदेखि प्रदेश संघले पनि प्रतियोगिताको आयोजना गर्ने बताए ।

कार्यक्रममा ट्रायथलन संघका सल्लाहकार विश्वशंकर पालिखे, संघका उपाध्यक्षद्वय दीपक कोइराला र सुमन देवकोटा, कोषाध्यक्ष निरज श्रेष्ठ, कास्की जिल्लाका अध्यक्ष प्रमेश पराजुली, प्रदेश खेलकुद परिषद् गण्डकीका उपाध्यक्षका साथै एनएसजेएफ गण्डकी प्रदेश , पर्यटन बोर्डका पदाधिकारीहरुको पनि उपस्थिति थियो ।