काठमाडौं (हाम्रो खेलकुद) – गोर्खाली रग्बी राष्ट्रिय फिफ्टिन्स रग्बी लिग च्याम्पियनसिपको उपाधि जितेको छ । दशरथ रंगशालामा त्रिभुवन आर्मी क्लबलाई शनिबार ६६–७ को स्कोरमा हराउँदै गोर्खालीले उपाधि जितेको हो ।

अपराजित रहँदै च्याम्पियन बनेको गोर्खालीले पहिलो खेलमा नेपाल पुलिस क्लबलाई ५४–३ ले र दोस्रो खेलमा एपीएफलाई ४९–२० को स्कोरमा पराजित गरेको थियो ।

गोर्खाली रग्बी ९ अंक सहित च्याम्पियन बनेको हो । गोर्खाली रग्बीले रनिङ ट्रफी सहित १ लाख रुपैयाँ प्राप्त गरेको छ । नेपाल एपिएफ क्लब दोस्रो बन्यो । लिग चरणको आफ्नो अन्तिम खेलमा पुलिस क्लबलाई ७७–६ को स्कोरमा हराउँदै एपिएफ दोस्रो बनेको हो । एपिएफले ७ अंक जोड्यो । एपीएफले ५० हजार रुपैयाँ प्राप्त गर्यो ।

आर्मीले ५ अंकसहित तेस्रो र पुलिस ३ अंकसाथ चौथो स्थानमा रह्यो । एपिएफका प्रमेश चौधरी उत्कृष्ट खेलाडी चुनिएर उनले ५ हजार रुपैयाँ प्राप्त गरे । च्यम्पियनसिपको प्रदर्शनका आधारमा राष्ट्रिय टोलीमा खेलाडी छनोट गरिने आयोजक नेपाल रग्बी संघले जनाएको छ ।

लिगलाई आगामी वर्षमा थप बिस्तार गर्दै लैजाने योजना रहेको संघका अध्यक्ष दीपक देवकोटाले बताए । विजेतालाई युवा तथा खेलकुद पूर्व मन्त्री हितबहादुर तामाङ, राष्ट्रिय खेलकुद परिषद्का सदस्य–सचिव टंकलाल घिसिङ, सदस्य सम्राटकुमार कुसारी, नेपाल रग्बी संघका अध्यक्ष देवकोटालगायतले पुरस्कृत गरे ।