सुमन अधिकारी,बुटवल

रुपन्देहीको तिलोत्तमामा जारी नवौं मणिमुकुन्द कप राष्ट्रिय पुरुष भलिबल प्रतियोगितामा सहभागी विभागिय टोलीले लगातार सफलता हासिल गरेका छन् ।

प्रतियोगिताको तेस्रो दिन आइतबार नेपाल पुलिस क्लब खेलेका दुबै खेल जितेको छ । त्रिभुवन आर्मी क्लब र नेपाल एपिएफ क्लब विजयी भएका छन् । अर्को खेलमा गण्डकी प्रदेश विजयी भएको छ ।

पुलिसले मधेश प्रदेश र सुदूरपश्चिमलाई हरायो । पहिलो दिन हुन नसकेको खेल आइतबार भएको थियो । आर्मीले कोशी प्रदेशलाई, एपिएफले कर्णाली प्रदेशलाई र गण्डकीले बागमती प्रदेशलाई पराजित गरेको छन् ।

आर्मीले कोशीले २५–२०, २५–१३ र २७–२५ लाई हराएको थियो । पहिलो र अन्तिम सेटमा कोशीले आर्मीमाथि दबाब बनाएपनि सफलता भने हात लागेन । प्रतियोगिताको दाबेदार आर्मीले समूह चरणमा सोमबार पुलिस र फागुन २ गते सुदूरपश्चिमसँग खेल्नेछ । समूह एमा आर्मीसहित पुलिस, सुदूरपश्चिम, कोशी र मधेश रहेका छन् ।

एपिएफले कर्णालीलाई २५–२१, २५–२१ र २५–२० ले हरायो । मधेश प्रदेशलाई २५–२०, २५–११ र २५–१२ ले हराएको पुलिसले सुदुरपश्चिम प्रदेशलाई २५–१७, २५–१४ र २५–१९ ले पराजित गर्यो । गण्डकीले बागमतीलाई २३–२५, २५–१९, २५–२१ र २५–२३ ले हरायो ।

मणिमुकुन्द भलिबल क्लब, रुपन्देहीको आयोजना प्रदेश खेलकुद परिषद, लुम्बिनीको मुख्य प्रायोजनत तथा नेपाल भलिबल संघको संयोजन रहेको प्रतियोगितामा १० टोलीको सहभागिता छ ।

समूह चरणमा मधेश र सुदुरपश्चिमको समान ३ र अन्य खेलको समान २ खेल बाँकी छ । समूह एमा पुलिस र आर्मीले समान २ खेल जितेका छन् । कोशी प्रदेशले ३ खेल २ खेल जितेको छ । मधेश र सुदूरपश्चिमले खेलेका सबै ३ खेल हारेका छन् ।

समूह बीमा एपिएफ र गण्डकीबीच कडा प्रतिष्पर्धा देखिएको छ । एपिएफ, लुम्बिनी र गण्डकीबीच प्रतिस्पर्धा छ । एपिएफ र गण्डकीले समान २ खेल जितेका छन् । बागमती प्रदेश ३ खेल जित्दै १ मा जित तथा २ मा हार व्यहोरेको छ । लुम्बिनीले २ खेलमा १ खेलमा जित हासिल गरेको छ । कर्णालीले सबै ३ खेल हारेको छ ।

प्रतियोगितामा सोमबार सुदुरपश्चिम र मधेश, लुम्बिनी र कर्णाली, पुलिस र आर्मी तथा एएफपी र गण्डकीबीच प्रतिस्पर्धा हुनेछ ।