काठमाडौं (हाम्रो खेलकुद)- धादिङ स्पोर्टस क्लबले होङवाङ्जी ढोरपाटन महिला भलिबल डबल लिग च्याम्पियनसिपमा लगातार दोस्रो खेल जितेको‌ छ ।

ढोरपाटन स्पोर्टस क्लबको आयोजनामा गोगंबु बसपार्क नजिक डिभी मार्केटसँगैको कोर्टमा जारी प्रतियोगिता आइतबार पहिलो खेलमा धादिङले बागमती प्रदेशलाई‌ ३-० को सोझो‌मा‌ हरायो‌। धादिङले बागमतीलाई २५-८, २५-१३,२५-१२ ले हराएको हो ।

पहिलो खेलमा धादिङले जावलाखेल भलिबल ट्रेनिङ क्लबलाई २५-२२,२५-१९,१८-२५ र२५-९ हराएको थियो । जावलाखेलले भने लगातार दोस्रो खेलमा हार बेहोरेको छ ।

धादिङ सँगै लगातार दुई खेल जितेको नेपाल पुलिस क्लब, एपिएफको समान ६ अंक छ। चन्द्रागिरी नगरपालिका महिला भलिबल टिमको ५ र त्रिभुवन आर्मी क्लबको‌ १ अंक छ ।

ढोरपाटन स्पोर्टस क्लबले आयोजना गरेको लिगमा एपिएफ, बागमती, पुलिस , जावलाखेल,  त्रिभुवन आर्मी क्लब,  न्यु डायमण्ड , धादिङ स्पोर्टस क्लब र एन्जल्स हार्ट गरि ८ टोलीको सहभागिता रहेकाे छ ।

पहिलो चरणमा शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ ।
ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ।