काठमाडौं (हाम्रो खेलकुद) – माउण्ट एभरेष्ट चेस क्लबका पुरुषोत्तम चौलागाईले स्काई वाल्क टावर अण्डर १९०० रेटिङ फिडे बुद्धिचाल प्रतियोगिताको उपाधि जितेका छन् ।
पूर्व नेपाल च्याम्पियन पुरुषोत्तमले ९ चरणको खेलमा ७ जित, १ बराबर र १ खेलमा हार व्यहोर्दै समग्र ७.५ अंकका साथ उपाधि जितेका हुन् । उनले २० हजार रुपैयाँ प्राप्त गरे ।

वण्डर नेपाल प्रा.लि.को आयोजनामा सम्पन्न दुई दिने प्रतियोगितामा १ सय ४५ जना १९०० रेटिङ्ग मुनिका खेलाडी सहभागी थिए । समान ७.५ अंक हासिल गरेता पनि डाइरेक्ट इनकाउन्टर , बुकोल्सका आधारमा कान्तिपुर चेस क्लबका पूर्व नेपाल च्याम्पियन नवीन तण्डुकार दोश्रो भए । उनले १३ हजार रुपैयाँ प्राप्त गरे ।

ललितपुर स्पोर्ट्स क्लबका धिरेन राई तस्रो भए र उनले ८ हजार रुपैयाँ प्राप्त गरे । भक्तपुरका हर्कबहादुर चोङ्वाङ चौथो भए र उनले ५ हजार रुपैयाँ पाए । स्काई टावरमा सञ्चालन भएको रेटिङ्ग बुद्धिचाल खेलमा ७ अंक सहित पेभिलियोन चेस एकेडेमीका सुशील चौधरी पाँचौं भए ।

समान ७ अंक जोडेका ललितपुरका कमल श्रेष्ठ छैटौं, विराटनगरका पूर्णराज खड्का सातौं, दमक झापाका मिशन दहाल आठौं र नवलपुर कावासोतिका सुजन काफ्ले नवौं भए । ६.५ अंक जोडेका भक्तपुरका निकेन कुसाथाले दसौं स्थानमा रहे । काठमाडौं जिल्ला बुद्धिचाल संघको रोहवरमा भएको प्रतियोगितामा ८० हजार रुपैयाँ पुरस्का रहेको थियो । १८०० रेटेड मुनि ललितपुर स्पोर्ट्स क्लबका सानुभाई महर्जन प्रथम भए ।

१६०० रेटिङ्ग मुनि थापथली पार्क चेस क्लबका भरत धिमाल, अनरेटेड तर्फ शंखुवासभाका राजकुमार राई विजयी भए । अनरेटेडमा राजबहादुर सिंह दोस्रो भए । महिलातर्फ नुवाकोटकी नेपाल च्याम्पियन डब्लूएफएम सुजना लोहनी विजयी भइन । भेट्रान तर्फ इटहरीका नारायण प्रसाद खतिवडा, युवा १६ वर्षमा बौद्ध काठमाडौंका सजल न्यौपाने र युवा १४ वर्षमा पेभिलियोन चेस एकेडेमीका अग्रिम शैंजू विजयी भए ।

तुल्सिलाल स्मृति क्लब टिम चेस प्रतियोगितामा गोदावरी नगरपालिकावाट प्रतिस्पर्धा गरेका शुभम् न्यौपाने आफै संयोजक बनेर स्काई टावर प्रतियोगिताको पुरस्कार रकम वण्डर नेपाल प्रा.लि. मार्फत प्रदान गरेका हुन् ।