काठमाडौं (हाम्रो खेलकुद)– टाइगर कप भलिबल प्रतियोगिताको महिलातर्फ ह्याट्रिक गरेर फर्केको एपिएफले  होङवाङ्जी ढोरपाटन महिला भलिबल डबल लिग च्याम्पियनसिपमा विजयी सुरुवात गरेको‌ छ ।

साविक विजेता समेत रहेको एपिएफले बागमती प्रदेशलाई ३-० को सोझो सेटमा हराएको थियो।
एपिएफ बागमतीलाई २५-४, २५-५ र २५- २ ले सजिलै हराएको हो ।

गोगंबु बसपार्क नजिक डिभी मार्केटसँगैको कोर्टमा शुक्रबार सुुरु भएको लिगको पहिलो खेलमा पुलिसले जावलाखेल भलिबल ट्रेनिङ क्लबलाई ३-० ले हराएको छ।

नियमित कप्तान कमला पुन, उषा भण्डारी र कामना विष्ट विना उत्रेको पुलिसले २५-१०,२५-१२ र २५-४ ले सहजै खेल जितेको थियो। पुलिसकी‌ कोपिला राना प्लेयर अफ दि म्याच घोषित भएकी थिइन् ।

ढोरपाटन क्लबले आयोजना गरेको लिगमा एपिएफ, बागमती, पुलिस , जावलाखेल, त्रिभुवन आर्मी क्लब, चन्द्रागिरी नगरपालिका न्यु डायमण्ड महिला टिम, धादिङ स्पोर्टस क्लब र एन्जल्स हार्ट गरि ८ टोलीको सहभागिता रहेकाे छ ।

आज अर्को खेलमा न्यु डायमण्ड र आर्मीबीच प्रतिस्पर्धा हुनेछ । पहिलो लिगको शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ । ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ।

प्रतियोगिताको विधागत उत्कृष्ट खेलाडीले जनही ५ हजार रुपैयाँ र एक्सटेपको जुत्ता प्राप्त गर्नेछन् । चिरायु अस्पताल प्रतियोगिताको मेडिकल पार्टनर रहेको छ।