काठमाडौं (हाम्रो खेलकुद)– घरेलु टोली गण्डकी प्रदेश चौथो टाइगर कप भलिबलको पुरुषतर्फ फाइनल पुगेको छ।

उपाधि रक्षाका लागि अघि बढ्ने क्रममा गण्डकीले एपिएफलाई ३-० को सोझो सेटमा हराएको हो ।
पोखरा रंगशाला भित्रको भलिबल कोर्टमा शुक्रबार गण्डकीले एपिएफलाई २५-१७,२५-२० र २५-२२ ले हरायो । गण्डकी ३ भारतीय खेलाडी लिएर उत्रेको थियो।

गण्डकीले फाइनलमा हेल्प नेपाल स्पोर्टस क्लबको सामना गर्नेछ। शुक्रबार नै उत्कृष्ट पुनरागमन गर्ने क्रममा हेल्प नेपालले श्रीलंका आर्मी टिमलाई ३-१ ले हराएको थियो।

पहिलो सेट १८-२५ले‌ गुमाएको हेल्प नेपालले त्यसपछि २५-१४,२५-१८ र २६-२४ को जित निकाल्दै फाइनल पुग्ने पहिलो टोलीले बनेको थियो।

त्यसअघि त्रिभुवन आर्मी क्लबले  टाइगर कप भलिबल प्रतियोगिता महिलातर्फ तेस्रो स्थान प्राप्त गरेको थियो ।
नेपाल पुलिस क्लबलाई ३–१ ले हराउँदै आर्मीले तेस्रो स्थान हासिल गरेको हो ।

पहिलो सेटमा २५–१७ को जित निकालेको आर्मीले दोस्रो सेट भने १८–२५ ले गुमाएको थियो । त्यसपछि तेस्रोमा २५–२० र चौथोमा २५–१९ को जित निकाल्दै आर्मीले तेस्रो स्थान प्राप्त गरेको हो ।

दुबैतर्फको फाइनल भने शनिबार हुनेछ । महिलातर्फको फाइनलमा साविक विजेता एपिएफ र चन्द्रागिरी नगपालिका न्यु डायमण्ड महिला टिमबीच प्रतिस्पर्धा हुनेछ । एपिएफले दुई पटक उपाधि जितिसकको छ भने न्यु डायमण्ड पहिलो पटक फाइनलमा पुगेको हो ।

महिला र पुरुष दुवै तर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।