सुर्खेत (हाम्रो खेलकुद)- गण्डकी प्रदेशले सुर्खेतमा जारी ३४ औं राष्ट्रिय पुरुष भलिबल प्रतियोगितामा लगातार दोस्रो खेल जितेको छ।

वीरेन्द्रनगरको खुलामञ्चको कोर्टमा आइतबार भएको दोस्रो खेलमा गण्डकीले मधेश प्रदेशलाई ३-० को सोझो सेटमा हराएको हो । गण्डकीले मधेशमाथि २५-११, २५-१९,२५-१३ को जित निकालेको हो ।

समूह ‘बी’मा गण्डकी र मधेश दुबैले आफ्नो पहिलो खेलमा सुदूरपश्चिम प्रदेशलाई हराएका थिए। समूहमा गण्डकीको ६, त्रिभुवन आर्मी क्लबको र कर्णालीको समान ३ , मधेशको‌ २, सुदूरपश्चिमको १ अंक छ।

आजको पहिलो खेलमा नेपाल पुलिस क्लबले बागमती प्रदेशलाई ३-० २५-१०, २५-१३ र २५-१७ ले हराएको थियो । गत साता बाग्लुङमा बुकी कप को फाइनल खेलेको पुलिसले आफ्नो पहिलो खेलमा लुम्बिनी प्रदेशलाई ३-० ले हराएको थियो।

समूह ‘ए’मा बागमतीले भने लगातार तेस्रो हार बेहोरेको छ । बागमती पहिलो खेलमा लुम्बिनी र दोस्रो खेलमा कोशीसँग पराजित भएको थियो। एपिएफसँग मंगलबार हुने अन्तिम खेल अघि नै बागमती प्रतियोगिताबाट बाहिरिएको छ।

आजै एपिएफ र लुम्बिनी तथा आर्मी र सुदूर पश्चिम प्रदेशबीच प्रतिस्पर्धा हुनेछ। लिग कम नकआउटपछि समूहका शीर्ष दुई टोली सेमिफाइनलमा पुग्नेछन्।

नेपाल भलिबल संघको आयोजना र कर्णाली प्रदेश भलिबल संघको व्यवस्थापनमा भइरहेको प्रतियोगिताको फाइनल पुस २६ गते हुनेछ ।