सुर्खेत (हाम्रो खेलकुद)- नेपाल पुलिस क्लबले सुर्खेतमा जारी ३४ औं राष्ट्रिय पुरुष भलिबल प्रतियोगितामा लगातार दोस्रो खेलमा जित हासिल गरेको छ।

वीरेन्द्रनगरको खुलामञ्चको कोर्टमा आइतबार विहान भएको पहिलो खेलमा पुलिसले बागमती प्रदेशलाई ३-० को सोझो सेटमा हराएको हो ।

उपाधि दाबेदार मध्येको एक पुलिसले बागमतीलाई २५-१०, २५-१३ र २५-१७ ले हराएको हो । गत साता बाग्लुङमा बुकी कप को फाइनल खेलेको पुलिसले आफ्नो पहिलो खेलमा लुम्बिनी प्रदेशलाई ३-० ले हराएको थियो।

समूह एमा बागमतीले भने लगातार तेस्रो हार बेहोरेको हो । बागमती पहिलो खेलमा लुम्बिनी र दोस्रो खेलमा कोशीसँग पराजित भएको थियो। एपिएफसँग मंगलबार हुने अन्तिम खेल अघि नै बागमती प्रतियोगिताबाट बाहिरिएको छ।

आज दोस्रो खेलमा समूह बी गण्डकी र मधेश प्रदेशबीच प्रतिस्पर्धा भइरहेको छ । यी दुबैले समान १ खेल जितेका छन्। समूह बीमा त्रिभुवन आर्मी क्लब, सुदूरपश्चिम र कर्णाली प्रदेश छन्।

आजै एपिएफ र लुम्बिनी तथा आर्मी र सुदूर पश्चिमबीच प्रतिस्पर्धा हुनेछ। लिग कम नकआउटपछि समूहका शीर्ष दुई टोली सेमिफाइनलमा पुग्नेछन्।

नेपाल भलिबल संघको आयोजना र कर्णाली प्रदेश भलिबल संघको व्यवस्थापनमा भइरहेको प्रतियोगिताको फाइनल पुस २६ गते हुनेछ ।